Aitor Aldanondo Bergaran jaio zen 1978an. Filosofia ikasi zuen EHUn, eta horretaz gain espagiria,  alkimia, makrobiotika eta txinatar medikuntza ikasketak egin ditu. Garraiolari bezala eta hainbat lantegitan egin du lan, eta musika talde ugariko kide izan da: Factoria 77, Brigada Criminal, Fiachras, What A Band, Bizardunak eta Harria.

Aldanondoren solasaldiak erakutsi digu xumetasunetik pentsamendu gardenak zuzen eta bilorik gabe esan daitezkeela. Euskal kulturaren transmisioaz hitz egin du, eta dio euskararen garrantzia erabileran dagoela. Haren ustez kapitalismoaren bukaeran gaude eta demokrazia ez da esistitzen: «Sistema fartsa batean bizi gara eta aro baten bukaeran», dio. Aitortu digu  agintearekin ez duela harreman onik.

Adarondoren ustez Euskal Herriaren desegitea gertuago dago hemen iraultza gertatzea baino. «Beste herrialdeek inbadituta gaituzte, gaztelania eta frantsesarekin batera amerikanismoa, ingelera iritsi dira», dio kexu. «Kanpoko inbasio asko jasaten ari gara, eta ez naiz ari migrateei buruz hitz egiten, pentsamoldeen inbasioa gainean dugu eta euskal transmisioa ez da ongi ematen ari». Aldarondoren ustez gurasoek pisu handia dute seme-alabei zer garen erakusteko, «baina guk geuk  ez badugu euskaraz egiten, akabo», ohartarazi du musikariak. Joseba Sarrionandiak garaian esan bezala, euskara gure territorio libre bakarra dela pentsatzen du musikariak.