Irati Aldayak 25 urte izan arren, bere bizitzan denborarik galdu ez duen gazte bat da. Derrigorrezko ikasketak Iruñean burutu zituen, eta txiki-txikia zenetik, auzoan, zirku klaseetan hasi zen. Urte horietan zehar, gainera, Nafarroako Goi Mailako Musika Kontserbatorioa ere egin zuen. Eta behin batxilergoa bukatuta, Donostiara bizitzera joan zen Pedagogia gradua ikasteko. Donostian oihal klaseak ezagutu zituen. Izan ere, zirkuarekiko afizioa ez zuen alde batera utzi nahi. Gradua bukatzerakoan masterra egitea erabaki zuen, psiko-pedagogia masterra, alegia.

Ondoren, Granadara joan zen bizitzera, izan ere, Granadan masterra egiteko aukera izateaz gain, bertan zirku mundu zabal bat eta mundu horretan murgiltzeko aukera asko zituelako. Zazpi urte kanpoan igaro ondoren, etxera bueltatu da Irati, Iruñera. Bertan, zirku irakaslea da, eta Nafarroako Zirika Zirkus konpainiarekin ere ibiltzen da lanean.