Oso kritiko mintzatu da NAIZ Irratian EHIGEko koordinatzaile Lurdes Imaz hezkuntza lege berriaren oinarriaren txostenarekin. Ez dute ikusten «euskal eskola publikoa» izango denik «hezkuntza lege berriaren ardatz», eta gainera, «egungo sistema duala betikotzeko asmoa» ikusten dute horren atzean. Albiste txarra da hori beretzat, orain arte sistemak erakutsi baitu sistema publiko-pribatua «porrotaren» eredu dela.

 Eskola segregazioa ekiditeko hainbat neurri aurreikusten diren arren, hauek ez direla «nahikoa» dio Imazek; Proposamena ez da «batere zehatza» bere iritziz, ez segregazioa ekidite aldera, ezta «hizkuntza ereduen gaindipena egite aldera» ere. «Eeduen sistema gainditzeko adostasun zabala oso handia da, eta mahai-gainean jartzen den euskara ardatz izango duen eredu eleaniztun hori motz geratzen zaigu», dio EHIGEko koordinatzaileak.

Nahiz eta ekarpenak egiteko epeak luzatu, «kezkatuta» daude guraso elkartean, egunotan alderdi bateko eta bestekoak entzunda, beldurra baitute «batere zehaztasunik ez duen dokumentu bat» izango den azkenean onartuko dena. Zentzu horretan, onartzen den dokumentuak azkenean eurek desiratzen dituzten «gutxiengoak» jasotzen ez dituztela ikusiko balute, argi utzi du aukera guztiak irekiak dituztela, mobilizazioena, baita epaitegietara jotzea ere.