Inoiz baino telesail eta film gehiago ikusi ditugu 2020 eta 2021 urteetan. Pandemiak baina urtea amaitzear da, eta dagoeneko jarri gara 2022ak dakarrenari begira. Idoia Dávila Uzkudunek datozen hilabeteetan ikusiko ditugun ikus-entzunezkoen zerrenda osatu digu.

'Licorice Pizza' - Urtarrilak 14

Urtarrilaren 14an estreinatuko dute Paul Thomas Andersonek zuzendutako film hau. Alana Haim eta Cooper Hoffman -Phillip Seymour Hoffmanen semea- dira aktore protagonistak eta bien lehen filma da. Lehen maitasunaren inguruko ‘coming of age’ bat da, 1973ko Californian girotua.

'Vortex' - Otsailak 2

Dementzia duen bikote baten bizipenak kontatuko dizkigu Gaspar Noé zuzendariak 'Vortex' pelikulan. Bere beste filmetan ez bezala, ez dago drogarik, biolentziarik edo sexurik, baina inoiz ez bezala sufrituko dugu zahartzaroaren eta gaixotasunen errealitatea ikusita.

'The Batman' - Martxoak 4 

Atzerapen askoren ostean, 2022an estreinatuko dute Matt Reevesen The Batman. Robert Pattinson da Batman berria eta lehen kritikek diotenez, ongo baino hobeto gorpuzten du superheroia. Aurretik arakatu gabeko Batman bat erakutsiko digu filmak, eta, diotenez, beldurrezko film bat dirudi.

'The Northman' - Apirilak 22

The Witch eta The Lighthousen ostean, Robert Eggersek X. mendeko Islandian girotutako istorio bat aurkeztuko digu. Abenturazko drama bat izango da, seguraski Eggersen fantasiazko elementu beldurgarriez beteta.

Aktore-multzo izugarria du: Alexander Skarsgård, Nicole Kidman, Anya Taylor-Joy, Willem Dafoe, Ethan Hawke, Björk…

'The Unbearable Weight of Massive Talent' - AEBetan apirilean

Tom Gormicanek zuzendutako film honetan Nicolas Cagek bere burua interpretatuko du. Cage desesperatuta dago eta Quentin Tarantinoren film batean parte hartu nahi du; horretarako, Espainiako hegoaldera joango da baina CIAren ikerketa batean murgilduko da nahigabe.

Horiez gain, dagoeneko famatuak diren pelikula askoren atal berriak ikusi ahal izango ditugu: Scream 5 (urtarrila), Fantastic Animals 3 (apirila), Legally Blonde 3 (maiatza), Knives Out 2 (iraila), Avatar 2 (abendua), Sherlock Holmes 3 (abendua), Hocus Pocus 2 (zehazteke).