Transkripzioa:

Ander:
Zer egiten duzu ilargira begira?

Ioar:
Ez nago ilargira begira.

Ander:
Gora begira zaude.

Ioar:
Izar asko dago gaur.

Ander:
Atzoko berberak dira, Ioar. Ez bat gehiago, ez bat gutxiago.

Ioar:
Badakit, Ander. Baina gaur izar gehiago ikusten ari naiz.

Ander:
Zerbait gertatzen al zaizu? Kontatu nahi didazu?, edo intimoa da?

Ioar:
Ez zait ezer gertatzen. Kontua da Euskal Herriko Unibertsitatean badela zientzialari taldea bat, IBeA izena duena. Mars 2020 misioan parte hartu du.

Ander:
Ez dut inoiz halakorik entzun.

Ioar:
Martera Perseverance ibilgailua iritsi zenean, planeta hartako datuak hona bidaltzen hasi zen berehala. Neurketa horiek ongi kalibratuta egotearen ardura Euskal Herriko ikerketa taldearena da.

Ander:
Orain ulertzen dut. Zuk... talde horretan egoteko gogoa daukazu.

Ioar:
Nola dakizu?

Ander:
Igarlea naiz! Zuri astronomia gustatzen zaizu, eta ni astrologoa naiz.

Ioar:
Beti adarra jotzen didazu...

Ander:
Ikerlari talde horretan sartzeko itxaropena duzu, bai edo ez?

Ioar:
Ez naiz ausartzen Gorka Aranari deitzen.

Ander:
Ikerlarietako bat al da Gorka Arana hori?

Ioar:
Bai.

AUDIOA-1 | GORKA ARANA

Ander:
Argi eta garbi geratu da martetarrik ez dagoela.

Ioar:
Ez dago, ez. Zeu zara geratzen den bakarra.

Ander:
Perseverance ibilgailua NASArena izango da, ezta?

Ioar:
Bai. Bi metro luze, bi metro garai eta hiru metro zabal da, gutxi gorabehera. Floridatik bidali zuten 2020ko uztailean, eta zazpi hilabete geroago iritsi zen Martera, 2021eko otsailean.

Ander:
Han ez dute ezer berezirik aurkituko.

Ioar:

Zuk zer jakingo ote duzu!

Ander:
Kasu egidazu.

Ioar:
Orain dela 4.000 milioi urte Marte planetan ura zegoela egiaztatu dute.

Ander:
Baina orain ez dago.

Ioar:
Marten duela milioika urte ibai bat izandako lekura bidali dute ibilgailua. Han zer bizi aukera dagoen aztertuko dute.

Ander:
Sentitzen dut zu nahigabetzea, baina han ez dago ezer.

Ioar:
Marteren meteorologiaren gorabeherak aztertuko ditu Euskal Herriko ikerlari taldeak.

Ander:
Marten ez dago hautsa eta hautsa eta hautsa besterik.

Ioar:
Planeta estaltzen duen hauts hori ikertzen saiatuko dira.

Ander:
Nire ustez, hautsak irentsi egingo du ibilgailua. Eta kito.

Ioar:
Helikoptero txiki bat ere bidali dute Perseverance ibilgailuan. Bi kiloko pisua du.

Ander:
Eta zein izen ipini diote dron horri?

Ioar:
Ingenuity.

Ander:
Izen aproposagorik ezin zuten asmatu.

Ioar:
Ez zaitez ezkorra izan.

Ander:
Estrabagante kuadrilla bat dira horiek guztiak. Lurrean izugarrizko arazoak ditugun bitartean, zoro horiek Marten daukate burua.

AUDIOA-2 | GORKA ARANA

Ioar:
Perseverance ibilgailuak 23 kamera daramatza. Eta horietako bati SuperCam esaten diote. Gaur egun dagoen sistema espektroskopiko konplexuena da.

Ander:
Zer arraio egingo du kamera horrek?

Ioar:
Sateliteen bitartez iritsiko zaizkien datuekin Marteko leku berezi horren mapa egitea lortuko dute.

Ander:
Oso interesgarria da kontatzen didazun guztia, baina aldi berean abentura amorragarria iruditzen zait.

Ioar:
Zergatik daukazu hainbesteko mesfidantza?

Ander:
NASAkoak ez zaizkit gustatzen.

Ioar:
Dena den, zuk oso gustuko dituzu mapak eta dokumentu kartografikoak.

Ander:
Bai, hala da. Baina mapa egin eta gero zer? Aberats bati salduko diote Marteko eremu hori?

Ioar:
Sorpresa bat emango dizut.

Ander:
Ez dut uste harrituko nauzunik.

Ioar:
Marteko Jezero kraterraren mapa egiten ari direnez, koadranteei izenak jarri dizkiete.

Ander:
Zein izen?

Ioar:
Urbasa, Urdaibai eta Basque Countryko sumendiak.

Ander:
Txantxetan ari zara?

Ioar:
Ez, ez, egia da.

Ander:
Tira... proiektu zoro hori apur bat gustatzen hasi zait. Deituko al diogu Gorka Arana delako horri?

Ioar:
Aurrera.

Epilogoa - Beti Ikasten

Ander:
Zer ikasi dugu gaur?
GOGOA singularrean esaten dugu.

—«Ikerlari talde horretan egoteko gogoa daukazu».

Ioar:
Hemen adibide batzuk:

—Jateko gogoa dugu.
—Berriz Urdaibaira joateko gogo bizia dut.
—Ez da erraza denen gogoa betetzea.

Ander:
ITXAROPENA ere singularrean jokatzen dugu:

—Ikerlari talde horretan sartzeko itxaropena duzu.
—Itxaropen osoa daukat gaur ez dugula galduko.
—Zure mezuak itxaropen apur bat eman zidan.

Hemen entzun dezakezue Gorka Aranari egindako elkarrizketa.