Oñatiko Eltzia espazioan nahastu ziren 'Bizarro' egitasmoko taldekideak, entsegu lokalean. Azken urteetan egindako kantuak plazaratzeko eman diote izena proiektuari, eta haien doinuek egingo duten ibilbidea ikusi nahi dute orain. 'Deshumanizazioa' osatzen duten 5 kantuak banan-banan plazaratu dituzte, maiatzaren 11 eta 15 artean, bakoitzak har zezan bere bidea.
Izenburu gogorra jarri diote 'Bizarrokideek' lehen lan honi, baina errezeloz betetako esperantza dago 'Deshumanizazioa'-ren atzean. Salaketa sinple-sinple jaurtitzea baino, taldeak nahiago izan du bere kantuak analisi konplexuagoz lagundu, eta horretarako testuak ere prestatu dituzte.