Pasa den astean, AHTren Euskal Herriko lanen gordintasuna erakuts dezaketen kontakizunaren berri eman zuen AHT Gelditu! plataformak. Zehazki, azpiegitura erraldoiaren lanetan aritu izan diren hiru langile ohiren testigantzak publikoki zabaldu zituen plataformak Iruñean egindako agerraldian. «Testigantzen arabera abusuak etengabekoak izan dira», plataformako kide Gorka Ovejerok NAIZ Irratian azaldu duenez.

Plataformarekin hitz egin dutenak «bota egin zituzten edo joan egin ziren» lan egiten zuten enpresatik, Ovejerok dionez, eta hori dela-eta izan dute «ausardia» bizitakoaren berri emateko. Aukera hori ez dute ordea, lanean jarraitzen duten askok. 

«Lan baldintza oso gogorrak, inolako segurtasunik ez, drogak, alkohola... ikuskaritza etortzen zenean aurretik abisatu eta dena txukun mantentzen zuten», Ovejeroren arabera. Egoera bereziki lazgarria da «jatorri kanpotarra dutenekin», AHT Gelditu! plataformako kidearen esanetan, «arrazakeria», sistematikoa baita.

Tafallatik gertu eraikitzen ari den tunel bateko langile ohi baten audio testigantzak gidari, Ovejerok langileok bizi duten egoera tamalgarriak aletu ditu NAIZ Irratian. Aipatu gehigikerietan sakonduz, ur azpian zeuden kable elektrikoen manipulazioz, suteez, substantzien erabilera orokortuaz edota miseriaren pare koka daitezkeen soldaten inguruan hitz egin du berak, ikusi duenari jarraiki. Egoera hauek salbuespenezkoak ez, baizik eta Euskal Herri osoan zehar AHTren obren paradigma direlakoan, honakoa galdetu du AHT Geldituko kideak: «Benetan Euskal Herrian XXI. mendean horrelakoak gertatzen ari al dira?», eta testigantza hauek bezain gordina da erantzuna: «Gertatzen ari dira».