Programa honen elementurik interesgarriena da «ez dela prebentziora mugatzen» eta kasu erreal bati aurre egiteko pautak ere ematen dituela. Andoaingo Aita Larramendi ikastolan KiVA programaren arduraduna den Ane Jalonek dio prebentzioa oso garrantzitsua dela baina jazarpen kasu bat gertatzen ari denean nola jokatu behar den zehaztea ere funtsezkoa dela.

KiVA programak ezarpen fase bat du eta lehenik irakasle guztiak formatzen dira. Lan hori eginda, Aita Larramendin bi astetik behin KiVA saioak egiten dituzte eta indar berezia jartzen dute jazarpen kasuetan dauden «rol ezberdinetan». Jalonek azaldu du «biktima eta jazarlea» daudela baina baita «ikasle isilak» ere esaterako. «Saio hauen bidez gure ikasleak ahaldundu nahi ditugu», ikusle izatetik aktibo eta «salbatzaile» izatera pasa daitezen.

Jalonek premisa bat du, «eskola jazarpena dago, existitzen da, toki guztietan». Hori argi izanda, eta batzutan detekzioa «zaila» denez, behaketak egiten dituzte eta familiei ere formakuntza eskeintzen diete.Jazarpen mota guztiak ikusten ditu Andoaingo ikastolako KiVA programaren arduradunak. Oso ohikoa da «zeharkako» jazarpena, norbait baztertzea edo norbatein inguruan zurruburruak zabaltzea adibidez. Ziberjazarpena ere badago, noski, «mundu fisikoan zeharkako jazarpena» dakarrena eta fisikoak ere existitzen jarraitzen du. «Biktimaren sufrimenduarekin amaitzea» da beti helburua.