Jon Marquet Gipuzkoako Triatloi Federazioko presidenteak dimisioa eman zuen joan den astean. Momentuz, jarduneko presidentea dela adierazi du NAIZ Irratian, eta sistema berria martxan jarri arte karguan jarraituko duela. «Urte olinpikoa denez, hauteskundeak egin behar genituen, baina lege berri bat ateratzen zela-eta, horren baitan antolatu behar genituen hauteskundeak. Urte osoa horrela ibili gara, eta oraindik berdintsu jarraitzen dugu».

Dimititzeko erabakia «bat-batekoa» izan dela nabarmendu du Marquetek: «Kontua luzatzen ari zela ikusita, iruditzen zitzaidan nolabait ikusgarria egin behar nuela».

Araudi berria atera bitartean, ezin dute aurrera egin. «Aurten hauteskundeak egon behar ziren, baina zuzenean hara joango bagina, kiroltxo bat izanik, inor konturatu gabe pasatuko ginateke». Gauzak horrela, Marquetek pentsatu zuen momentua zela pixka bat azaltzeko zein den egoera, eta nola dauden kirol desberdinak. Haren hitzetan, «batzuk sekulako baliabideak dituzte, baita sekulakoa boterea ere».

Bereziki, futbola aipatu du: «Futbolak badu bere diru iturria, batez ere telebista eskubideengatik. Horrekin, laguntza besteek jaso beharko genuke. Aurten diru laguntza orokorretan, lehen kanpoan zeuden arren, aurten futbol talde xumeak gure zaku berean sartu dituzte».

«Aurten futbol talde xumeak gure zaku berean sartu dituzte»

Gipuzkoako Foru Aldunditik jasotzen dute zein den horretarako irizpidea. Marquet 2021ean sartu zen presidente Gipuzkoako Triatloi Federazioan. Momentu hartan federazioak «17.500 euro inguru» jasotzen zituen Aldunditik. Marquetek azaldu du lehenengo eta bigarren urtean diru kopuru hori jaso zutela, eta emakumeen triatloia bultzatzeko proiektua egin zutenean, «22.000 eurora» igo zutela kopurua. Bestelako laguntzak ere badituzte, adibidez, lau urtean behin materiala erosteko, urtero sei federazioei ematen zaiena.

«Erantzun gutxi jaso ditugu»

Horren inguruan, presidenteak adierazi du «nahiko arraroa» dela: «Niri normalena iruditzen zait bilera bat egitea, eta gurekin adostea zer erosi. Baina hor ere, ia-ia lehiaketa bat bezala egiten duzu. Nork bere eskaera aurkezten du, beraiek puntu batzuk onartzen dituzte, eta horren baitan ematen digute diru laguntza. Iaz espero genuena baino gutxiago jaso genuen, erreklamatu eta argibide askorik eman gabe gehiago eman ziguten».

Horrelako beste adibide bat ere jarri du Marquetek. Eskola mailan ere diru laguntza batzuk zeuden eta triatloia hortik kanpo geratu zen. Zerrendan ez egotearen arrazoia eskatu, eta laguntza jasoko zutela adierazi zion Aldundiak federazioari. «Bat-batean, behin-behineko zerrenda atera zuten, eta jartzen zuen triatloia aurrekontutik kanpo zegoela. Argitzeko eskatu dugu eta ez dugu erantzunik jaso».

Gipuzkoako Aldundia alde bakarreko erabakiak hartzen ari ote den galdetuta, Marquetek esan du haiekin «gehiago» hitz egin behar dutela: «Galdetu dugun gutxietan, erantzun gutxi jaso ditugu, eta uste dut gehiago merezi dugula».

Federazioak ere autokritika egin du. Emakumeen triatloiari bultzada emateko proiektua sortu zuten, eta lehen bi urteetan gorakada bat sumatu zuten arren, Marquetek adierazi du azken urtean goranzko joera gelditu egin dela: «Liga misto bat sortu genuen, bi emakumeen partaidetzarekin, klubek puntu batzuk eta hainbat laguntza jaso zitzaten. Indartzen joatea zen asmoa, baina gorakada gelditu egin da. Pena bat da. Puntutxo bat gehiago beharko genuke sustapenean».

«Liga misto bat sortu genuen, bi emakumeen partaidetzarekin. [...] Indartzen joatea zen asmoa, baina gorakada gelditu egin da»

Orain dela bi aste Zarautzen egin zuten bikote mistoen proba, eta 250 bikotek parte hartu zuten. Partaidetza «polita», Marqueten hitzetan. Baina, adibidez, Donostiako emakumearen triatloian, partaidetza «pixka bat gelditu» egin da: «Aurten ez dugu egin eguraldiagatik, baina duela sei-zortzi bat urte 300 emakumetik gora lehiatzen ziren, eta orain 200-250era iristea zaila izaten da».

Kosta egiten da jendea triatloira erakartzea? Marquetek adierazi du material «asko» behar dela, haiek ere zailtasunak dituztela mugitzeko, eta klub bakoitzak bere herrian bultzatu behar duela triatloia: «Diziplina hau nahiko korapilatsua da».

«Aurpegi berriak behar dira»

Honen guztiaren aurrean, zein da irtenbidea? Zein bide jarraitu behar du triatloiak? Marquetek ez du erantzun garbirik. Triatloia eskola kirolean sartzea izan zen proposamenetako bat, baina presidenteak adierazi du hori bultzatzen hasi zirela, baina ez dutela asmatu: «Zailtasunak izan genituen. Momentu batean saiakera egin genuen, baina esan ziguten momentuan ezin genuela hori egin, triatloia ez baitago eskola kirolaren barruan… Gainera, zaindu behar duzu bailara desberdinekoak ezin direla mugitu batetik bestera adinaren arabera eta abar. Triatloia egiten hasten direnak, gehienetan gurasoek bultzatuta da. Multzo bat elkartzea zaila izaten da».

«Duela hiru urte sartu nintzen ikusten genuena ez zitzaigulako gustatzen. Indarra hartzeko sartu ginen, eta uste dut gure lana egin dugula»

Marquetek dimisioa publiko egin ostean, Aldunditik erantzunik jaso ote duen galdetuta, adierazi du harekin harremanetan jarri zirela: «Jakin nahi zuten zein modutan burutu zuen dimisioa». Alegia, kirol entitateen erregistroan egin behar zuela, bestela ez baita baliagarria. Marqueten erantzuna izan zen «lehendabizi materialaren inguruan egin zituzten bileren erantzuna jaso nahi duela, eta gero egingo dituela egin beharrekoak».

Orain «prozesu batean» sartuko direla azaldu du presidenteak. Hauteskundeetan norbait aurkezten bada, harentzat «hobeto»: «Duela hiru urte sartu nintzen ikusten genuena ez zitzaigulako gustatzen. Indarra hartzeko sartu ginen, eta uste dut gure lana egin dugula. Aurpegi berriak behar dira triatloiari bultzada emateko».

Amaitzeko bota die proposamen potoloa gainerako kirol gutxituei: «Polita izan daiteke pixka bat berdintsu sentitzen garenok aurrerapausoa ematea, eta sistema berria atera bitartean, dimisioak pilatzea».