Gipuzkoako Foru Aldundiak bere eskumeneko errepidetan bidesariak jartzeko politikarekin jarraitzen du eta Beasain eta Bergara arteko bidea da azken kaltetua. Larunbat honetan protesta deitu dute Zumarraga eta Urretxu artean bidesari honen aurkako plataformak eta HIRU garraiolarien sindikatuak.

Ion Altuna HIRUko ordezkariak NAIZ Irratian berretsi du euren sindikatua peaje sistemaren aurka dagoela, «errepideak ondasun publikoa dira eta ondorioz denon artean ordaindu behar dira, zerga bidez». Foru Aldundiari dirua biltzeko bidesarien sistema erabiltzea egotzi dio eta salatu garraiolariek kaltetzen dituela politika honek, «maiz esaten dute zer garrantzitsua den garraiolarien lana, baina gero dena oztopoak dira».