Adi eta Ari | Plural hurbila

[2x5] Plural hurbila landuko dugu ikasgai honetan. Deklinatzeko forma berezi bat da, -o bokalarekin markatzen dena.

NEREA:
Egun on, Ander.

ANDER:
Baita zuri ere, Nerea.

NEREA:
Badakit antzerki zalea zarela. Inoiz izan al zara Pabellón Número Seis antzeztokian?

ANDER:
Bai, noski. Bilbon dago. Deustuko ibarreko pabilioi industrial baten barruan antolatutako toki bat da, eszenako arteak lantzeko.

NEREA:
Noiz sortu zen gogoratzen al zara?

ANDER:
Berrehun antzerkizale euskaldun eta erdaldun elkartu ziren bazkide egiteko 2011. urtean. Orain antzerki laborategi bat da, eta antzokia dauka obrak taularatzeko.

NEREA:
Pabellón 6 laborategiko Gazte Konpainiak 'Komedia madarikatua' antzezlana prestatu du. Obraren zuzendaritzan aritu den Gaizka Chamizo mintzatu da NAIZ Irratian.

ANDER:
Gazte Konpainiaren lehen promozioa 2015ean sortu zen, eta 2016an Shakespeare dramaturgo ingelesaren 'Romeo eta Julieta' eskaini zuten.

NEREA:
Orain landu duten obraren titulua 'Komedia madarikatua' da. Belizismoari absurdotik egiten diote kritika.

ANDER:
Gizakion ergelkeriari kritika egitea gai klasikoa da antzerkian.

NEREA:
Kutsu absurdoa baldin badauka antzezlanak, umore 'inteligentea' praktikatuko dutela espero dut.

ANDER:
Umorea euskaraz lantzea garrantzitsua da beti aktore batentzat.

NEREA:
'Komedia madarikatua' obran sei antzezle agertuko dira oholtzan.

AUDIOA-GAIZKA CHAMIZO

NEREA:
Bioi deklinatze modua erabili du Gaizka Chamizok.

ANDER:
Bai. Izen bat deklinatzeko garaian -o marka edo mugatzailea erabiltzen dugu noizean behin. Adibidez: «Denok batera joan ginen Bilbora. Zuk eta biok antzerkirako asmoa geneukan».

NEREA:
Mugatzaile marka horrek hurbiltasuna adierazten du. Eta pluralean deklinatzen da. Horregatik batzuek deitzen diote plural hurbila: ikasleok, dantzariok, kazetarioi, langileoi, arrantzaleontzat, kirolariontzat...

ANDER:
Hitz egiten ari denak bere burua talde batekoa kontsideratzen du. Esate baterako: «Antzerkilariok berritsu fama dugu». Horrek esan nahi du mintzatzen ari dena ere aktorea dela.

NEREA:
Hori da. Beraz, ni idazlea ez naizenez, ez dezaket esan: «Idazleontzat zergak murriztuko omen dituzte».

ANDER:
Nerea... gu biok astronautak ez garenez, ez nuke esan behar: «Astronautok arrisku handiak hartzen ditugu».

NEREA:
Baina aktorea baldin bazara, edozein paper jokatzeko gaitasuna duzunez, taula gainean esan dezakezu: «Shakespeare eta biok gara historiako dramaturgorik onenak».

ANDER:
Zu eta biok formula polita da, ezta?

NEREA:
Era dotore bat da ni esalditik kentzeko. Hau da: ni ez esateko sartzen dugu biok.

ANDER:
Olatzek eta biok elkarrekin afaltzera joateko asmoa dugu.

NEREA:
Ander, Olatz eta hirurok ondo moldatzen garenez, ni ere joango naiz afari horretara.

GAIZKA CHAMIZO

NEREA:
Zuk eta biok ondo emango genuke komedia batean, ezta?

ANDER:
Zu eta biok barregarri samar geratuko ginateke eszenatoki batean, baina inork ez luke barrerik egingo.

NEREA:
Formula hori erabiltzen dugunean, subjektu guztiak deklinatu behar al dira?

ANDER:
Halaxe komeni da, bai. Adibidez: «Zuretzat eta biontzat antzeztuko dute gaurko obrari». Edo: «Zuri eta bioi doan emango dizkigute sarrerak».

ANDER:
Baina subjektuak asko direnean?

NEREA:
Kasu horietan nik ez ditut izen guztiak deklinatzen. Esate baterako: «Olatz, Mikel, Leire, Xabier eta bostontzat tokia dago automobilean».

Hemen entzun dezakezu 'Komedia Madarikatua' antzerki obrari buruz egindako elkarrizketa.