En direct
Harro ez da Pride, harro Korrika da
Nafarroako trabestiek kolorez eta harrotasunez jantzi dute Erribera. Plataforma altuak zapatilekin ordezkatu dituzte, eta euskaraz bizi den Euskal Herri anitza aldarrikatu dute Murchantetik Cascantera bidean egindako kilometroan. Haiekin batera egin du korrika NAIZ irratiak.
Harro ez da Pride, harro Korrika da
Kolorerik ez da falta Korrikan, baina igande honetan Nafarroako trabestiek printza berezia eman diote. 730. kilometroaren zain zirenen artean, purpurina, lentejuelak, ileordeak eta urduritasun asko zegoen pilaturik. LGTBIQ+ ikurrak ez ziren falta bertaratutakoen artean.
Mendillorriko Maruxak taldeko kideek hartu dute lekukoa lehenik, Albina Stardust burlatarra eta hamarnaka lagun ondotik segika zituztela. Yogurinha Borovaren ‘Sentipenak askatu’ kantuaren doinuekin tipi-tapa zirela, euskal trabestiak ere «harro eta euskararen alde» direla azaldu digu kideetako batek.
Arnasestuka, baina euskararen alde «urtean behin behintzat» gorputza mugitzea garrantzitsua dela aitortu digu beste batek, txantxa giroan. Aske bizitzeko aldarria lau haizetara zabaldu dute Nafarroako trabestiek. Aske, eta euskaraz noski.
AEK-ko kideek goraipatu dute Maruxak taldeko kideen parte hartzea Murchantetik Cascantera bidean egindako kilometroan, «Euskal Herri anitza nahi dugulako».
Korrikak Nafarroako Erribera zeharkatu du igande honetan, eta gauean Lizarraldean izango da. Astelehenean iritsiko da Arabara. Goizean Mendialdean izango da, eta arratsaldean milaka lagun bilduko dira Gasteizen euskararen alde.
Kontxako bandera zuzenean, NAIZ Irratian
«Sistema berria atera bitartean, polita litzateke berdin sentitzen garenon dimisioak pilatzea»
«Gaztetan hasi nintzenean, ez nuen espektatiba handirik; iritsi zaidana esker onez hartu dut»
Zein eragin du jarduera fisikoak gure ongizate psikologikoan?
«Udara honetan konfiantza eman zidaten eta maila ematen ari naiz»
