Bazen behin zekien guztia paperean idatzi zuen pertsona bat. Bazen ere zerbait ez zekien eta paper hori aurkitu zuenean ikasi zuen beste pertsona bat. Bazuen lagun bat hitz multzoari irudiak gehitu zizkiona.

Bazen beste behin irudimen handiko pertsona bat, bere istorio eta ideia guztiak hitz bihurtu eta orri batean idatzi zituena. Bazen ere istorio horiek irakurri eta hitzetan murgilduz bidaiatu zuen norbait. Bazuen lagun bat eta bidaia guztiak kontatu zizkion.

Bazen behin hizkuntza bat gordetzen zuen paper multzo bat. Bazen behin pertsona askoren historia kontatzen zuen ezkutuko paper multzo bat. Bazen behin ume bati indarra eman zion paper multzo bat. Bazen behin dena irakatsi zigun paper multzo bat.

Baziren behin paper multzo horiek elkartu eta gorde zituzten pertsona asko, baziren irakurle asko eta idazle asko. Baziren pertsona eta istorio asko. Bazen behin liburua.

Bada gaur Liburuaren Nazioarteko Eguna eta badira gaur irakurle asko, lagun asko liburuen magia elkarbanatu dutenak eta besteoi irakurri digutenak.