Hondartzan, bainuen arteko tarteak irratia entzuteko profitatzen dituzue? Dena dela, hondartzan inork entzuten al du irratia oraindik? Kotxean gidatzen zoaztela gurekin sintonizatu baduzue, ez zaitezte despistatu, Gaizka Izagirrek zinearen bitartez bidaiatzeko aukera ekarriko badigu ere. Agian, etxeko garbiketa egiten ari zareten superheroiak zarete. Nerea Baldak eskainiko dizkigun literatura proposamenekin amestera gonbidatzen zaituztegu, erratza hartuta, izan sorgin ala ez.

Eta, baliteke, baita ere, zuetako batzuk 'dolce far niente' hutsean harrapatu izana, hamakan ala sofan etzanda. Zorionak, gozatu bihotzez. Gure gonbidatuek errealitate berdinaren bi alderdi desberdin erakutsiko dizkigute. Alde batetik, teknikariok sindikatuko bi kide etorriko dira, sektorearen arazo eta kezkak azaltzera. Eta,bestetik, Andoni Mutiloa izango dugu bisitan, bere lehen espektakuluaren berri emateko.