'003', barruti bat baino gehiago

Gitarra lepoan zintzilik duela edota pianoaren aurrean ere ikusi dugu Xabi Hoo 'Enkore' taldean edota bere sare sozialetan maiz. Oraingo honetan, ordea, beste zerbait dakar eskuartean bilbotarrak.

'Zero' kantua kaleratu zuen lehendabizi. «Kantua esatea gehitxo da, 'freestyle' bat dela esaten dugu guk. 'Moustak' ekoizleak doinuak eginda zituen, eta, hitzekin diodan moduan, ohe gainean nintzela doinu horiek janzteko besteko etorria izan nuen eta forma eman nion. Ekoizleari gustatu eta publiko egitea erabaki genuen 'Zero'», kontatu digo Hook.

Musika urbanorako saltoa egingo zuela erakutsi zigun aurrerapen horrekin, intentzio argiak. Baina 'Enkore' taldean egindako 10 urte horietan ere ikusi ditugu halakoak, zer esanik ez 'Hegan II' kantua egin zutenean. «Gure taldearen bueltan hainbat rap egile izan ditugu: Aneguria, La Basu, Xatiro… Eta horiei halako miresmena nien nik. Gure 'nagusiak' ziren eta gu ume moko batzuk haien ondoan. Horregatik '003 Mixtape' aurkezpen lanaren izena ere. Azkenean Bilbon denok dakigu zer esan nahi duen '003'koa izateak eta gure izaeran dagoen hori ere azaleratu nahi izan dut kantuetan», nabarmendu du Hook.

Hiru kantu izango dituen lana izango da, ez disko bat. Horregatik aukeratu du 'Mixtape' hitza, garaian AEBetan musika urbanoan agertzen zirenek beren burua aurkezteko hitz hori erabiltzen zutelako. 'Zero' ezagutu genuen eta orain 'Bat' ezagutu dugu. 'Bi' eta 'Hiru' abestiak ezagutzeko zain geratuko gara beraz; geratzeko etorri baita bueltan Xabi Hoo.