Sasoi honek baduelako berezko doinu bat, 'Mozorroen azpiko doinuak' izenburupean pasako dugu hilabetea. Musika bidez, iñauterien mundu erritual, transgresore eta magiko horretan murgildu nahi dugulako; mozorroek ezkutatzen duten hori guztia doinu bihurtuz.

Eta bidaia honi hasiera emateko, gaurko saioan gure lurrari, gure historiari eta gure sustraiei begiratuko diegu. 'Sustraiak eta Burrunba' deitu diogu gaurko atalari.

Antzinako neguko erritualetara joko dugu, herri baten taupada zaharrenak ernatzera. Joareen burrunba, makila kolpeen erritmoa eta mendi arteko oihartzuna izanen ditugu lagun.