Bi urte pasa dira Indabe taldeak debuteko ‘Noiz arte?’ EPa kaleratu zuenetik eta bi urte baino lehenago kaleratu dute estreinako diskoa, ‘Ez banaiz’. Soinuz aberats eta lehen lana izateko interesgarri dator Nora Azurza, Peru Blanco eta Uxue Estrada lagunek egindako albuma. Gainera, taldean aldaketaren bat izan ostean, Azurzak baxua hilabete gutxian jotzen ikasi eta konfiantza hartu behar izan du diskoa defendatzeraino.

Diskoa ez da kontzeptuala, edo bai, sentimenduen eta harremanetan sortzen diren afektibitate mota desberdinen inguruan hitz egiten baitute abestietan. Brit-pop delakoaren munduan kokatzen gaituzte, nahiz eta shoegaze edota noisearen zantzuak ere nabaritzen diren abestiren batean edo bestean. Sinte sotilen artean, gitarra eta oinarri erritimikoak dira protagonista. Estradaren gitarra geruzetan aberastasuna topa dezakegu eta oinarri erritmikoak sendo eusten die kantuei. Kantaera ere berezia du Estradak eta koroetan lanketa handia egin dute, zuzenekoei begira erronka ederra sortuz. 

Zuzenekoak abian dituzte eta asteburu honetan bertan bi kontzertu eskainiko dituzte. Ostiralean, apirilak 11, Antiguako Platero tabernan formatu akustikoan izango dira eta bertaratzen direnek diskoaren edizio fisikoa eskuratzeko aukera izango dute lehenengo aldiz. Hurrengo egunean, apirilaren 12an, Donostiako Zentro Sozialistan izango dira Herenegun taldearekin batera.

MusikHaria saioan xehetasun osoz kontatu ziguten diskoaren nondik norakoa eta orain hemen entzuteko aukera ere baduzue, diskoa entzuteko aukeraz gainera.