Saio honetan gai serioak jorratzen saiatzen garen arren, batzuetan seriotasuna alboratu eta kazetaritza horia besarkatzeko tentazioari ezin eutsi gabiltza. Horrexegatik hautatu dugu gaurkoan kultura baino saltsa gehiago duen gai hau: beef-ak, edo artisten arteko areriotasunak, abesti bihurtuta.

Raparen historiako beef-ik ilunen eta, era berean, garrantzitsuenarekin hasiko gara: 2pac eta Notorious B.I.G. kontrajarri zituena, euren bizitzak eramanez. Horrez gain, Espainiar estatutan gertatutako beste areriotasun batzuk ere aztertuko ditugu, C Tangana eta Los Chikos del Maiz-ena edota Kase.O eta Metrorena, kasu.

Euskaldun jatorroi liskarrak gustatzen ez zaizkigula uste baduzue ere, gurean berriki gertatu den beste beef batean ere sakonduko dugu, noski: Chill Magia eta Kai Nakairen artekoa. Eta emakumeak ere ez dira saltsaz libratuko: raparen testuinguruan hainbat dira liskarra izan dutenak (eta hedabideek, gainera, ez dute horretan laguntzen), nahiz eta Nicki Minaj-ek eraman istiluen saria.

Osasun mentala bogan dugun garaiotan, bandera gorria suposatuko lukete gaurko abesti guztietako letrek. Baina, esan bezala; egoera txarri batzuetan fribolitate apur batez eta umorez begiratzea ez dago hain gaizki, ezta?