ANDER:
Nerea, Galder Izagirreren Beldurrarekin batera abestia entzuten ari zinen, ezta?

NEREA:
Bai, aurrekoan lehen aldiz entzun nuen eta abesti berezia dela iruditu zitzaidan.

ANDER:
Ezagutzen ditugun bere lanekin alderatuta, badu ukitu ezberdin bat.

NEREA:
Aitortu behar dizut orain arte ez nekiela asko Galderri buruz. Baina oso elkarrizketa interesgarria egin zion aurrekoan Iker Gurrutxagak Musikharia saioan eta ordutik gustura ari naiz bere lana deskubritzen.

ANDER:
Nerea, ez dituzu Berri Txarrak, Kuraia edo Dut bezalako taldeak ezagutzen?

NEREA:
Bai, noski! Baina Galder ezkutu antzean ibiltzen zen atzean, bateria jotzen.

ANDER:
Jakina, zuk lehen lerrokoei bakarrik begiratzen diezu! Galderrek oso ibilbide ona izan du musikaren munduan eta orain bakarlana sortzera animatu da.

NEREA:
Duela 33 urte inguru hasi zuen musikako ibilbide hori eta ordutik ia bi urtero sortu du lan berriren bat.

AUDIOA | Galder Izagirre

NEREA:
Lokaleko lana eta zuzeneko bira tartekatzea gustatzen zaio, horrela «zuzeneko biran hasten zara berriro sormenaren gogoak egiten, kristo(re)n gogoak sartzen zaizkizu lokalean sartu eta kantu berriak egiteko».

ANDER:
Sormena pizten omen diote zuzenekoek, sekulako gogoa.

NEREA:
Beti pentsatu izan dut egundoko emozioa sentitu behar dela oholtza gainean norberak sortutako abestiak jende guztiak batera kantatzean.

ANDER:
Izugarrizko poza izango da, bai, baina antzerkiarekin ere gertatuko zaizue zuei, ezta?

NEREA:
Bai, baina imajina ezazu zeure burua orain oholtza baten gainean, isiltasuna aretoan. Bat-batean lehen notak baterian jo eta jendea zurekin batera abesten hasten da... Bua! Itzela!

ANDER:
Itzeleko beldurra!

NEREA:
Bai, zera!!! Adrenalina da hori!!!

ANDER:
Ez dakit, baina ni oso urduri jarriko nintzateke.

NEREA:
Badakizu Galder, musikaria izateaz gain, argazkilaria ere badela?

ANDER:
Ez nuen horren berri! Ziur horretan ere ondo moldatzen dela!

NEREA:
Eta telebistako Bidegurutzean saioaren zuzendaria ere izan zen. Hainbat musikarik kabina baten barruan euren barne mundua erakusten zuten, euren beldurrak eta horiei nola egin aurre, etab.

ANDER:
Ziur baten batek kristorenak esango zituela!

NEREA:
Oso gauza interesgarriak esan zituzten, bai.

 

AUDIOA  | Galder Izagirre

 

ANDER:
Saio horretan entzundakoak ESC disko berri honen hastapena izan zirela esan dezakegu.

NEREA:
Hala da, kristoren gogoak piztu omen zitzaizkion Galderri bere lan berri honetan murgiltzeko.

ANDER:
Azken batean, denok dauzkagu beldurrak eta, beste batzuek ere badituztela jakiteak, gureak onartzera eraman gaitzake.

NEREA:
Zuk zer izan nahiko zenuke, zure beldurrak kenduta?

ANDER:
Ene, a ze galdera!

NEREA:
Horixe galdetu diote amaitzeko Galderri.

ANDER:
Eta zer erantzun du?

AUDIOA  | Galder Izagirre

ANDER:
Kristoren erantzuna!

NEREA:
Bai, eta gurea ere sekulako saioa!

Hemen duzue Musikharia saioan Galder Izagirreri egindako elkarrizketa.