Zortzi kantu berri gehitu ditu bere fonotekara Kilimak taldeak ‘Irrikitan’ diskoarekin. Agus Garmendia eta Ione Zozaya dira taldearen ahotsa eta irudia, baina laukotean aurkeztuko dituzte sortu dituzten abesti berriak, nahiz eta diskoan jende gehiagok hartu duen parte. Paxkal Etxeparerekin grabatu eta ekoitzi dute diskoa eta erabat doinu tropikalak dituela esan daiteke. 

‘Irrikitan’ abestiarekin, diskoari titulua ematen dionarekin, hasten da diskoa. Bizitza bizitzeko dela eta besteei ere lasai bizitzen uzteko aldarria egiten dute Kilimak taldekoek. Horretarako, oinarri elektroniko sendo bat duen merenge kantu bat erabili dute, giro horietako kantuetan hain ohikoa den hitzak errepikatzeko formulaz baliatuta. 

‘Aio’ kantuarekin Zaldibobo edota Juan Luis Guerra bezalako erreferentziak etorri zaizkigu gogora. Afrikako eta Karibeko doinuen nahasketa berezi hori bai baitu eta perkusioak badu hor errurik. Artistaren bizia eta emantzipazioa uztartzen dituen kantua da, musikara salto egiten duen musikari askok etxean ez baitu berehalako onarpenik izaten. 

Euskara aldarrikatzen duen kantua da ‘Euskaraz’. Flamenkoa eta popa uztartzen ditu, haize sekzioaren ekarpen ederrarekin eta halako elementu mistiko eta fikziokoak batzen dizkio letrari Kilimak taldeak. 2000etako musikaren bueltan koka genezake kantu hori eta baita ‘Ezer ez da betiko’ ere, zaintzari egindako abestia. Instrumentazioan eta pianoa erabiltzeko moduan garai haietan kokatzen gara eta lotsarik gabe esan digute baietz, «Caribe Mix bezalako diskoak etengabe bueltaka ibiltzen» zirela haien gailuetan.

Berriz ere Juan Luis Guerra eta 4:40ren mundura eramaten gaitu ‘La noche y el día’ abesti erromantikoak. Erromantizismotik urrundu gabe, maitatzen ongi ba ote dakigun zalantzan jarriko duen ‘Maitemina’ abestiak ematen dio segida diskoari. Europa ekialdeko edo Balkanetako musikatik edaten du kantuak, elektronika modu bitxian erabili dute eta ska ukitu bat ere hartzen du kantuak.

Bizitza errusiar mendi bat dela argi uzten digute diskoa ixten duen rumba abestiarekin. ‘Gora behera’ izeneko abestia da, teklatu salseroak ditu, elektronika indartsua bonboan eta kutxan, baina lehen tronpeta kolpetik rumbara goazela argi uzten digute, taldearen hasierak gogora ekarriz. 

70etako diskoen azala du Andoni Clavok diseinatutako edizio misikoak eta zuzenekoak ere abiatzear dira. Lehenengoa Baionan izango da, larunbat honetan, apirilaren 5ean eta Kupela sagardotegian izango da hitzordua. Gainera, gauldia zabaltzen Gozategi taldekoak izango dituzte ondoan, beraz, dantza egin nahi duenak, ‘Irrikitan’ ibili nahi duenak, badaki non duen aukera.