ANDER:
Kaixo, Nerea. Zer moduz?  

NEREA:
Kaixo, Ander. Ondo, eta zu?

ANDER:
Primeran, eskerrik asko. Begira, gaur Goiatz Labandibarren 'Bekatua' eleberriaren ingurukoelkarrizketa entzun dut.

NEREA:
Gogoan dut, bai. Goiatz kazetaria eta ipuingilea da eta bere lehen eleberri luzea aurkeztu berri du.   

ANDER:
Askotan galdetu izan omen diote noizko idatziko zuen lehen eleberri hori, emakume askori ama noiz izango diren galdetzen dieten bezalaxe.

NEREA:
Halaxe da, bai! Zenbatetan entzuten ditugu oraindik horrelakoak!

ANDER:
Badirudi, benetako emakumea izateko ama izan beharra dagoela.

NEREA:
Bestela emakume «osoak» izango ez bagina bezala! Nik uste nuen hori gaindituta zegoela, baina konturatu naiz herrietan nahiz hirietan oraindik ere galdetzen direla horrelakoak, leku  guztietan, baita igogailuan ere!

ANDER:
Goiatzek ere bere esparruan hori sentitu izan du, «benetako idazle izateko derrigorrezkoa dela eleberri luzea idaztea».

NEREA:
Kasu honetan ziur bi aldetatik entzungo zituela Goiatzek horrelako komentarioak: emakume izateagatik eta idazle izateagatik. Noiz utziko diogu horrelakoak pentsatzeari?

ANDER:
Oraindik denbora dezente pasatuko dela uste dut. Bitartean, entzun dezagun zein izan zen Goiatzen lehen eleberri luze honen abiapuntua.

AUDIOA | Goiatz Labandibar

NEREA:
«Nola funtzionatzen du buruak lorik egin ezin dugunean»

ANDER:
Interesgarria litzateke hainbat pertsonaren buruetan zer gertatzen den jakitea lo edota esna daudenean!

NEREA:
Esaten dituzten astakeriak ikusita, batzuen kasuan hobe buru horien barruan zer dagoen ez jakitea.

ANDER:
Nik, lo eta esna, bietan izaten ditut burua nahasten didaten ideiak; eta gustatuko litzaidake horiek guztiak ordenatu eta paperera pasatzeko gai izatea.

NEREA:
Pertsona baten buruan dauden pentsamendu horiek guztiak harilkatu edota lotzea ez da batere erraza izango.

ANDER:
Hori da idazleen magia, horrelakoak egin eta irakurleok bidaia horretan sartzea.  

AUDIOA | Goiatz Labandibar

NEREA:
Ideia horiek guztiak atzera eta aurrera dabiltza eleberriko protagonistaren baitan.  

ANDER:
Badirudi Garazi ideia batetik bestera saltoka ibiliko dela eleberrian zehar, askok bizitzan egiten dugun bezalaxe.

NEREA:
Hala ere, ziur Goiatzek liburua ez duela atzekoz aurrera idatzi eta ideia guztiak era ordenatu eta koherente batean landu dituela.

ANDER:
Bai, bai, lan neketsua litzateke liburu, pelikula edota antzezlan bat amaieratik hastea, ezta? Ni film askotan galdu egiten naiz bat-batean denboran aurrera salto egiten dutenean eta gero lehenagoko gaira itzultzen direnean. Flashbackak dira horiek.  

NEREA:
Beste asko, berriz, ez atzera ez aurrera ibiltzen dira bizitzan euren lekua aurkitu nahian.  

ANDER:
Nonahi aurki ditzakegu halakoak, bai. Gero eta gehiago dira adibidez norberaren bidea aurkitzera bideratutako liburuak.

NEREA:
Nik goitik behera irakurri ohi ditut horrelako liburuak, bertan dagoen guztia ondo barneratzeko, baina ez dut inoiz nahi dudana topatzen!

ANDER:
Ezker-eskuin ere irakurri beharko dituzu hemendik aurrera, agian hor topatuko baituzu zure bidea!

NEREA:
Bideaz ari garela, bide ederra egin dezala Goiatz Labandibarren lehen eleberri luze honek. Guk gustura irakurriko dugu oso-osorik, eta hasieratik hasita.

Hemen entzun dezakezue Goiatz Labandibarran 'Paraleloan' saioan izandako elkarrizketa.