Duela ez gehiegi izan genituen NAIZ Irratiko MusikHaria saioan Inner talde gernikarrekoak. ‘Arrakala’ da haien estreinako lana eta Edorta, Fidal, Musa eta Remen dira taldea osatzen dutenak. Musikan ibiliak aurretik ere. Etxean aurkeztuko dute diskoa, eta literalki izango da kasu honetan, Gernikako Iparragirre Rock Elkartean grabatu zutelako diskoaren zati bat ere. 

Zazpi kantu osatu dituzte beren lehen diskorako, kantu mardulak. Tio Pete estudioan, Urdulizen, izan ziren instrumentuak grabatzen, denek elkarrekin eta zuzenean jota. Gero, ahotsen grabaketa, nahasketa eta masterizazioa etorri ziren Gernikan. Azken zati hori guztia ‘zuk zeuk egin’ filosofiarekin, gainera.

Rock musika da lantzen dutena, baina ertz desberdinetatik jaso dituzte eraginak. Orokorrean goxoa da lana, biluztasuna eta betetasunarekin jolasean ibili dira abestietan eta erritmoekin ere ako jolastu dute. Dinamiken maitaleak direla nabaria da. Abestien hitzak, berriz, nahikoa karga politiko dutela esan dezakegu. Poliziaren indarkeria, desinformazioa, sistema kapitalista, Urdaibaiko Guggenheima edota gizartea bitan zatitzen duen ‘Arrakala’ izan dituzte hizpide.

Arrakala horren alde batean edo bestean, non kokatzen garen jakiteko barne gogoeta proposatzen digute eta, esan bezala, zuzenean gozatzeko aukera izango da Gernikan, larunbat honetan, otsailak 1. Diskoari xehetasun gehiago jakin nahi izatekotan, berriz, goiko aldean duzue MusikHaria saioan izandako elkarrizketa. 

Eta zu, arrakalaren zein aldetan zaude?