Termometroak eztanda egin dute ostegun honetan ere 'Reggae Fever' irratsaioan eta horretarako, musikarik onenari egin nahi izan diogu lekua gurean. Aste honetako txandari dagokionez, The Skatalites musika talde jamaikarra izan dugu jaun eta jabe Naiz irratiaren uhinetan. 1964.urtean sortu zen banda hau eta ordutik, Ska, Rocksteady, Reggae edota Ska Jazz bezalako estiloak uztartzen dituzte.

Asteko klasikoaren protagonismoa hartu dute ondoren ordea The Gramophone Allstars Big bandako lagunek. Hauek ere jamaikarrak ditugu, eta onenetan onena ekarri nahi izan dugu 60.atal honetarako. Amaitzeko ordea, McCook-en abesti bat entzuteko parada ere egin dugu 'Jatorrizkoa eta Moldaketa' atalean, baina tartean, Fajador Recordsen azken lana ere entzun dugu.