Transkripzioa:

Ioar:
Zer saltsatan sartu zara Interneten?

Ander:
Egon, egon..., momentu bat... Segituan naiz zurekin...

Ioar:
Kaixo, Ander. Kaixooo. Egun ooon. Hemen nago ni. Eta zu... non zaude?

Ander:
Egun on, Ioar. Rol jokoen webgune batean nabil.

Ioar:
Katigatuta ikusten zaitut. Ea, erakutsi hori!

Ander:
Euskal rol jokalarien webgunea da. ´Rolariak puntu eus´ izena du. 2021eko apirilean abiatu zuten eta hilero eduki eta albiste berriak ekartzen dituzte.

Ioar:
Ikusten dudanez, euskaraz dago oso-osorik.

Ander:
Zuk, Ioar, ba al dakizu zer den rol jokoa?

Ioar:
Bai. Fikziozko mundu batean sartzea da. Jokalariak pertsonaia bat antzezten du, rol bat interpretatzen du, eta istorio bateko kontakizunean murgilduko da. Hori da gutxi gorabehera, ezta?

Ander:
Bai. Jokoetako bakoitzak edo istorio bakoitzak bere arau propioak ditu.

Ioar:
Entzunda dudanez, jokoan ekintza bat egin edo beste bat egin, arrakasta edo hutsegitea izango duzu.

Ander:
Jokoak gidari bat edo zuzendari bat dauka, eta hark proposatzen ditu jolasaren kontakizuna eta arauak.

Ioar:
Inoiz jolastu al zara?

Ander:
Ez. Baina nola jokatzen den ikasi nahi nuke.
Ioar:
Nik ezingo dizut lagundu. Ez naiz istorio horietan ibiltzen.

Ander:
Irratian hizketan entzun ditut rol jokoak antolatzen dituzten bi mutil: Ibai Peña eta Pello Gutierrez.

AUDIOA-1 | ROLARIAK

Ioar:
Atopia hitza esan du?

Ander:
Bai. Joko bat da Atopia, fikziozko Euskal Herri batean kokatua. Euskaraz sortutako lehenbizikoa da.

Ioar:
Noiz egin zuten?

Ander:
2019an argitaratu zen. Durangoko Azoka antolatzen duen Gerediaga Elkarteak beka bat eman zuen rol joko hori sortzeko.

Ioar:
Ba al dakizu zeri buruzkoa den?

Ander:
Bost fakzio edo talde daude, eta gatazkan dabiltza batzuk eta besteak.

Ioar:
Joko horretan asmatu zuten, beraz, maizter izena, master edo gidaria euskaraz adierazteko.

Ander:
Hori da. Atopia jokoan agertzen diren pertsonaien gaitasunak ere bost dira: arrazoia, indarra, aditasuna, trebetasuna eta eragina.

Ioar:
Hain dira fantasiazkoak, ez baitut asmorik joko hauei arreta ipintzeko.

Ander:
Ba, niri hainbeste gustatzen zaizkit istorioak eta jolasak, ezen atrapatuta bainaukate webgune honetan.

AUDIOA-2 | ROLARIAK

Ander:
Rolariak webgunea osatzen dutenek bi rol jaialdi antolatu dituzte dagoeneko.

Ioar:
Jendeak etxetik ordenagailu bitartez jokatzeko?

Ander:
2020. urtean izan zen lehenengo Rolaldia, abendu hasieran. Bigarrena 2021ean izan zen, Gabonak inguruan. Eta bigarren aldi hartan aurrez aurre jardun zuten.

Ioar:
Non izan zen jaialdia?

Ander:
Hiru hiritan: Getxon, Donostian eta Gasteizen.

Ioar:
Egun berean?

Ander:
Bost egun ezberdinetan.

Ioar:
Aizu, rol jokoetako istorioak ez al dira biolentzia handikoak?

Ander:
Denetik dago. Bortitzak direnean, uste dut umore beltz kutsu bat izaten dutela. Eta, jakina, horiek ez dira haurrentzako modukoak.

Ioar:
Zer esan nahi duzu, umeentzako rol partidak ere badaudela?

Ander:
Zer uste zenuen ba!

Ioar:
Ikasten hasteko, zuretzako modukoak izango dira.

Ander:
Ze graziosoa!

Ioar:
Tira, Ander, erakutsi egidazu “Rolariak puntu eus” webgunean daukaten bilduma.

Ander:
Begira. Hemen duzu Antzinako eskola jokoa. Gaztelaniaz sortutakoa da, baina Eneko Mazo delako batek euskaratu zuena. Uste dut Atopia sortu baino lehen itzuli eta argitaratu zuela.

Ioar:
Gehiago ere ikusten ditut hor.

Ander:
Euskaratu egiten dituzte erdal jokoetako orriak eta materialak. Dozena bat badituzu hemen.

Ioar:
Den-denak zuretzat, Ander. Ni banoa.

Ander:
Nora?

Ioar:
Botanikako erakusketa bat ikustera.

Ander:
Bihar arte, orduan. Nik Alien pertsonaiaren euskarazko orria jaitsi behar dut.

Epilogoa - Beti Ikasten

Ander:
Zer ikasi dugu gaur?
Ondoriozko perpausa.

Solasaldian Ioarrek esan du:
—«Hain dira fantasiazkoak, ez baitut asmorik joko hauei arreta ipintzeko».

Ioar:
Beste forma hauek ere izaten dituzte ondoriozko perpausek:

—Hain zen altua, non sabairaino heltzen baitzen.
—Pastel hori hain da gozoa, ezen oso-osorik jango bainuke.

Ander:
Ondoriozko esaldi bat ere egin dut nik:

—«Hainbeste gustatzen zaizkit istorioak eta jolasak, ezen atrapatuta bainaukate».

Hemen entzun dezakezue  Ibai Peña Arratibel eta Pello Gutierrez Peñalbarekin rol jokoen inguruan izandako elkarrizketa.