2019an plazaratu zuen Estitxuk 'Haize gorri batek' diskoa. Bakarkako lehen lana duen arren, aski gazte sartu zen abeslari beratarra musikaren munduan: Egan taldean hasi zen 15 urterekin, eta ordutik hona hamaika kolaborazio eta proiektutan parte hartu du. Duela urte batzuk, euskal kantagintza omentzeko kontzertu berezi batzuetan aritu zen, eta bertan hamaika euskal musikari eta artista ezagutzeak piztu zion gogoa bere sorkuntza propioak taularatzeko. Duela bost urte ingurutik zerabilen ideia buruan, eta su txikian egin ditu diskoa osatzen duten 7 abestiak.