Adi eta Ari | Sinonimoak: gisa, moduan, legez

[1x33] Ikasgai honetan 'moduan', 'gisa' eta 'legez' sinonimoak landuko ditugu.

 

NEREA:
Kaixo, Ander!

ANDER:
Banan-banan sendatu ere, zauri odoleztatuak. – Berean jarraitzen du, abesten.

NEREA:
Ander...

ANDER:
(Berean jarraituko du...)

NEREA:
Ez dut enbarazurik egin nahi, Ander, baina saioa hasi behar dugu.

ANDER:
Barkatu, Nerea! Napoka Iria taldearen 'Ibiltzeko gertu' abestiarekin dantzan nenbilen.

NEREA:
Taldea gustatzen al zaizu?

ANDER:
Ez dut asko entzun orain arte, baina Dani Irazoki 'Doinuetatik Haratago' podcastean hizketan entzun nuen aurrekoan, eta bere gomendioetako bat izan zen.

NEREA:
Egia da abestiak baduela dena geldiarazteko boterea.

ANDER:
Miren Narbaizaren ahots berezia Ander Mujikaren gitarrarekin fusionatzeko modua oso ederra izan da.

NEREA:
Dani Irazoki beratarrak hauxe esan du abestia aukeratzeko:

AUDIOA | Dani Irazoki

NEREA:
«Ander Mujikaren gitarra jotzeko sentsibilitateak erakutsi zidan badagoela gitarra jotzeko beste modu bat».

ANDER:
Asko gustatzen zait Gartxotek egiten duen 'Doinuetatik haratago' podcasta. 'Bigarren kafea' saioan aritzen da asteazkenetan eta oso talde eta abesti interesgarriak ezagutu ditut, bertan ematen diren gomendioei esker.

NEREA:
Bertan astero gonbidatu bati bere musika gomendioak egiteko eskatzen dio eta, horri esker, talde eta abesti berriak ezagutu ditzakegu.

ANDER:
Hauxe izan zen aurreko saio baten aurkezpena:

AUDIOA | Dani Irazoki

ANDER:
«Ongi etorri, saioaren atal berri honetara. Badakizu hemen, astero legez elkartzen garela doinu berri batzuk ezagutu eta gure belarriak goxatzeko».  

NEREA:
Astero legez astero bezala edo astero (egiten dugun) moduan egituren baliokidea litzateke.

ANDER:
Hala da. Modua adierazteko balio dute, eta beraz, nola galderari erantzuten diote.

NEREA:
Adibide batzuk emango ditugu: «Zuk esan duzun bezala egin dut dena».

ANDER:
«Zuk esan duzun moduan egin dut dena» edo «zuk esan legez egin dut dena».

NEREA:
«Atea behar bezala ixten ez baduzu, zarata egingo du».

ANDER:
«Ariketak irakasleak esan dituen legez egingo ditugu».

NEREA:
Gartxotek esan duen moduan, «aste honetako gonbidatua zinez berezia da».

AUDIOA | Dani Irazoki

NEREA:
Larrungo gainean dago Kaiola Benta, eta, bertan, Kabia kultur proiektua.

ANDER:
2019an ekin zion ibilbideari eta ordu ezkeroztik hainbat kultur ekintza antolatzen dituzte.

NEREA:
Bere sortzaile diren Danik eta Itziarrek dioten bezala, «Nafarroaren eta Lapurdiren arteko mugan egoteak, lurraldeak hurbiltzen dituen puntua izatera eraman behar gaitu».

ANDER:
Berriro ere bezala egitura erabili duzu!

NEREA:
Hori da gaur ikasten ari garena eta!

ANDER:
Orain arte ikasitakoaz gain, bezala/bezalako, moduan/moduko eta legez/legezko bereizi behar ditugu.

ANDER:
Nola galderari erantzuteko bezala erabiliko dugu: «amak bezala dantzatzen dut».

NEREA:
Nolakoa galderari erantzuteko, berriz, bezalako erabiliko dugu: «ama bezalakoa zara», «amak bezalako arropa janzten duzu beti».

ANDER:
Gauza bera gertatuko da moduan/moduko eta legez/legezko hitzekin:

NEREA:
«Zuk esandako moduan egin ditut ariketak», «aitak esan duen modukoa zara: jator, alai eta dibertigarria».

ANDER:
«Nahi duzun legez egin dezakezu hori». «Zure moduko jertsea darama gaur gure lankideak». Ziur aski azken egitura hau bezalako baino gutxiago erabiltzen dugu.

Hemen entzun dezakezue 'Doinuetatik Haratago' podcasta Dani Irazokirekin.