[23] Jule Goikoetxea filosofoarekin hausnarketan

Ezkerra birformulatzera dator 'Estallidos. Revueltas, clase, identidad y cambio politico'  izenburu duen liburua. Jule Goikoetxea filosofo politiko eta EHUko irakasleak eta Albert Noguera, legelari eta politologo kataluniarrak idatzi dute. 

Transkripzioa:

Ander:
Kaixo, Ioar.

Ioar:
Egun on.

Ander:
Zer moduz zaude?

Ioar:
Ondo.

Ander:
Non daukazu burua?

Ioar:
Lepo gainean.

Ander:
Urruti daukazu begirada. Kezkatu al zaude?

Ioar:
Pentsatzen ari naiz.

Ander:
Jakin al dezaket zeri buruz?

Ioar:
Bai.

Ander:
Esan, orduan.

Ioar:
Jule Goikoetxea idazlea da.

Ander:
Badakit. Donostiarra da. Poema liburu argitaratu zuen Susa argitaletxearekin.

Ioar:
Filosofoa da. Politikan aditua da. Euskal Herriko Unibertsitatean eskolak ematen ditu.

Ander:
Editorea ere bada. Pentsamendu feministako liburu bilduma bat gidatzen du.

Ioar:
Hori da. Baina berak idatzitako saiakerak ere badauzka. Gaztelaniaz argitaratu duen liburu bati buruz hizketan entzun dut irratian.

AUDIOA-1 | JULE GOIKOETXEA

Ioar:
Munduko leku askotan gertatu dira eztandak azken hogei urteetan.

Ander:
Nahi dugun moduan uler dezakegu eztandaren ideia? Niretzat egundoko eztanda izan zen New Yorkeko Dorre Bikiak eraistea.

Ioar:
Nik ulertu dudanaren arabera, eztandak dira sistema politikoak kolokan jartzen dituzten mugimendu sozial zabalak.

Ander:
Irlanda, Eskozia, Euskal Herria eta Kataluniako independentzia eskakizunak, ahaleginak eta mobilizazioak eztandak balira bezala jotzen ditu Espainiak.

Ioar:
Euskal Herriaren eta Kataluniaren aurka Espainiako sistemak errepresio gogorrez erantzun izan du beti.

Ander:
Udaberri arabiarra piztu zen antzera ez da beste eztandarik lehertu, ezta?

Ioar:
Demasa izan zen hura. Tunisian hasi zen. Gizon batek bere burua erre zuen injustiziaren aurrean protesta egiteko. Eta hortik aurrera zeharo berotu zen jendea.

Ander:
Tunisiako lehendakariak dimititu egin behar izan zuen.

Ioar:
Egipton milioika pertsona irten ziren manifestazioetan, Mubarak presidentearen kontra. Eta Libian Gadafiren kontra. Eta Sirian Al Assaden kontra.

Ander:
Ikaragarrik izan ziren gobernuen errepresioak.

Ioar:
Baina Egipton lortu zuten Mubarakek kargua uztea.

Ander:
Eta Gadafi hil egin zuten azkenean!

Ioar:
Sirian gerra zibil handi eta luze bat sortu zen.

Ander:
Beste era batean, mobilizazio feminista handiak izan dira azken urteetan: Argentinan, Polonian, Espainian.

Ioar:
Eta Amerikako Estatu Batuetan beltzen aurkako jazarpenen ondoren protesta biziak ikusi ditugu.

Ander:
Frantziako txaleko horiak ere hor daude. Borroka garrantzitsua ematen du.

Ioar:
Eztanda horiek bat-bateko protestak, istiluak eta aldarrikapenak iruditu arren, badituzte denek ezaugarri komunak.

Ander:
Injustizia da niretzat ezaugarri komuna.

Ioar:
Zapalketa, pobrezia, boterearen gehiegikeria, eta abar. Ez dira gutxi ezaugarri komunak, nahiz eta denak modu eta intentsitate diferentekoak izan.

AUDIOA-2 | JULE GOIKOETXEA

Ander:
Zein izenburu dauka Jule Goikoetxeak plazaratu duen liburuak?

Ioar:
Gazteleraz da: Estallidos. Revueltas, clase, identidad y cambio politico.

Ander:
Mundua nola dabilen ikusita, ezkerreko mugimendu politikoek eta filosofikoek obligazioa daukate beren teoriak eta kontzeptu klasikoak aztertzeko eta berriz definitzeko.

Ioar:
Jule Goikoetxeak eta Albert Nogera politologo kataluniarrak, biek elkarrekin osatutako liburua da.

Ander:
Zuk ba al daukazu?

Ioar:
Ez. Baina uste dut liburuan aztertu dutela zergatik gertatu diren eztanda horiek guztiak.

Ander:
Ziur aski esplikatuko zuten zein diren bereizgarriak, zer daukaten komunean, zerk ezberdintzen dituen...

Ioar:
Argi ikusten da haserrea oso zabalduta dagoela. Eztandak mundu osoan gertatzen ari dira.

Ander:
Ni oraindik jaio gabea nintzela, Txinan gertatu zen mobilizazio erraldoi bat. Pekingo Tiananmen plazan jendetza bildu zen protestan. Eta gobernuak tankeak bidali zituen.

Ioar:
Non gertatuko ote da hurrengo eztanda?

Epilogoa - Beti Ikasten

Ander:
Zer ikasi dugu gaur?
Moduzko perpausa.
Esate baterako:

—«Nahi dugun moduan uler dezakegu eztandaren ideia?».
—«Udaberri arabiarra piztu zen antzera ez da beste eztandarik lehertu».

Ioar:
Beste bi ere esan ditugu:

—«Kataluniako independentzia mobilizazioak eztandak balira bezala jotzen ditu Espainiak».
—«Nik ulertu dudanaren arabera, eztandak dira».

Ander:
Moduzko perpausa bat da hau:

—Ahal izan dugun neurrian lagundu dugu eztanda politikoen gaia esplikatzen.

Hemen entzun dezakezue Jule Goikoetxeari egindako elkarrizketa.