Gasteizen hainbat familia bizi diren etxebizitzetatik kaleratu nahi dituztela salatu du NAIZ Irratian Auzoan Bizi Etxebizitza Sindikatuko Xanti Hidalgo Gereñuk, adingabeak tartean, «Familia hauek daukaten alternatiba bakarra oraingoz, bertan egotea da». Eliza katolikoari lotutako Berakah programak Hogar Belen delako eraikinetik alde egin behar zutela jakinarazi zien egun batetik bestera, inolako alternatiba edo babesik eskaini gabe eta elkarrizketari, ateak itxiz.

Etxebitza sindikatu honen ordezkariak aurreratu duenez, «negoziaziorako prestutasuna» du auzo mugimenduak, «eta saiatuko gara jabearekin zuzenean negoziazio bat abiatzen, bertan gelditu diren familia guztiei alternatiba duin bat eskaintzeko». Beste irtenbiderik ez dutelakoan hainbat bizilagunek, auzo sarearekin batera, erresistentziara jotzea erabaki dute eta baita eraikina Beyt Lahm berrizendatu ere, Zisjordaniako Belen hiriaren arabierazko izena.