Lesio batek egun batzuk edo hilabeteak iraun ditzake… baina zergatik? Gaurko tertulian Mikel Mendioroz fisioterapeutak lagundu digu gorputza hobeto ulertzen: giharrek, tendoiek eta lotailuek ez dute berdin erantzuten, eta horrek guztiak azaltzen du zergatik diren sendatze-prozesuak hain ezberdinak.

Halaber, hitz egin dugu zerk egiten duen lesio bat iraunkorra: kargaren kudeaketa desegokia, berriz hasteko presak, adinak edo ohitura txarrek sendatze-prozesua luzatu dezaketela. Tendoi-lesioak, lotailuak eta gihar-lesioak bereizten dituzten ezaugarriak argitu ditugu, baita tratamendu eraginkorrenak zeintzuk diren ere.

Prebentzioari begira ere jarri gara: nola kudeatu kargak, zer rol duen indar entrenamenduak eta nola identifikatu benetan prest gauden unea. Gorputzak bere erritmoa du, eta hori errespetatzea da lesio iraunkorrik ez izateko gakoetako bat.