Hamar kantuz betetako debuteko diskoa da ‘Ez gara modernoak’, Puntu Takoma talde nafarraren lehen lana. Kantuak sortu eta kanpora ateratzeko beharretik Asier Etxeberria Munarrizek dei egin zion Nestor Aranguren Lesakari. Ideia bat buruan eta horri tiraka sortuta daude kantuak, modernitateari uko egin eta hortik abiatzea guztia. 

90etako musikari aldarria egiten dion abestia da diskoari izena ematen diona, aldarrikapenez josita eta eszenari buruzko argazki propioa osatzen duena. Ainhoa Garcia Bengoa entzun daiteke koroetan, egun taldeko parte bihurtu dena Gorka Padrones bermeotarrarekin batera. Musikkii estudioetan grabatu dute diskoa Adrian Vallejo Salvatierrarekin eta Mikel Bidarrauzagak egin die diskoaren diseinua.

Gitarra efektuak zenbat nahi beste entzun daitezke diskoan, fonetikarekin jolasean eta melodikotasunari muzin egin gabe. Eszenari kritika egiteaz gainera, matxismoari, izaera kolektiboaren eta norbanakotasunaren arteko talkari, klase borrokari, kapitalismoari, bizitzak daraman erritmoari eta bakardade kolektiboari buruz hitz egiten digute haien abestietan. Guztia, ekoizpen oso zainduarekin.

Zuzenekoak ere abian dituzte eta berriak ere etorriko dira. Bitartean, xehetasun guztiak ezagutzeko aukera duzue Asier Etxeberriak MusikHaria saioan izandako elkarrizketan azaldu baitzituen guztiak. Modernotasunik ez, baina kalitatea zenbat nahi beste Puntu Takomak.