Animaliek urratuko bideak izaten dira askotan lehen arrastoa ematen dietenak. «15 urte inguru daramatzagu Alegia inguruko mendietan bizikletan ibiltzeko bideak prestatzen. Askotan sasi artean galduta dauden bideak topatzen ditugu eta aitzakia horretan leku ederrak ezagutu ditugu». Garai bateko bideak berreskuratzen ere jardun dute.

Hasieran beraiek erabiltzeko bideak egin zituzten baina denbora gutxian zabaldu zen bizikleta zaleen artean Alegiako bideen berria. «Gipuzkoan legeztatu ziren lehen bideak izan ziren eta azkar hasi zen jendea bide horiek erabiltzen. Gutxi erabiltzen badira, bideak galdu egiten dira, baina gehiegizko erabilerak ere bideetan kalteak eragiten ditu». 

Zentzu horretan, duela aste batzuk auzolanerako dei bat egin zuten bideak txukuntzeko. «Gu geu ere harrituta geratu ginen. 50 lagunetik gora hurbildu ziren sare sozialen bidez egindako deialdira eta jendeari bere lanabesak ekartzeko esan behar izan genion, guk denentzako adina ez genuelako».

Entzun Manex Balerdirekin eta Iñaki Altunarekin Bigarren Kafean izan dugun solasaldia.