Urtebeteko ibilbidea egin du udal gobernu berriak Donostian. Baina gauza gutxi aldatu direla uste du oposizioko buru Juan Karlos Izagirrek. Norabide aldaketarik ez dagoela-eta, «etsipen puntu bat» ere baduela aitortu du EH Bilduko udal taldeko bozeramaileak. Harrituta ere badago; legegintzaldia hasi berritan norabide aldaketa bat beharrezkoa zela aitortu baitzion Eneko Goia alkateak. «Azaleko zenbait aldaketa» izan badira ere, gobernuan «interes pribatuen mesederako hiri eredua» elikatzen jarraitzen duela deritzo.

Turismoa, etxebizitza eta mugikortasuna dira talde subiranistarentzat kezka-iturri nagusiak. Eremu horietan hartu diren neurriak «eskasak izan dira eta berandu iritsi dira». Herritarrak entzunez eta herritarrekin batera ekinez jardun nahi du EH Bilduk, marearen kontra.