Inteligentzia emozionalaren eta sozialaren alorrean lanean diharduen Monsso elkarteko kideak dira Kaanache eta Roucour de Corral. Egitasmoaren bigarren ekitaldia izan zen iazkoa baina Monssok esku hartu zuen lehena. Eusko Jaurlaritzako Ados batzordetik jaso zuten enkargua. «Gure intentzioa urtero egitea da, erakundeen laguntza izan edo ez» azaldu du Kaanachek.

Zeharkaldian parte hartu duten gazteen arteko elkarbizitza sustatzea zen helburuetako bat eta Kaanachek argi zuen horretarako garrantzitsua zela eguneko ordu guztiak elkarrekin pasatzea. «Batera gosaldu, batera barre egin eta batera negar egin dugu. Elkarrekin egote hori faktore mugatzaile oso positiboa izan da».

Tolosako mezkita, Begoñako basilika eta adinekoekin lan egiten duen Aspaldiko fundazioa bisitatu zituzten zeharkaldian eta horrek parte hartzaileengan emozio ezberdinak azaleratu ditu Kaanacheren aburuz. «25 urteko gazte batek esan zigun ez zuela sekula marrokiarra ez den inorekin bazkaldu eta hori Euskal Herrian gertatzen da; horrek niri gauza asko esaten dizkit».

Dokumentala duela aste batzuk estreinatu zuten Orioko Arraunetxean, herriko ikastetxeetako DBH 3 eta 4 mailetako ikasleen aurrean eta hemendik aurrera hezkuntza komunitatean zein beste alorretan hedatzea da helburua.

Entzun Hossain Kaanacherekin Bigarren Kafean izan dugun solasaldia