CCOO, UGT, Ekintza eta PIM sindikatuek zuzendaritzarekin akordioa lortu eta biharamunean, greba egun berria dute asteazken honetan Gasteizko Mercedesen, ELA, LAB eta ESK sindikatuek deituta.

Enpresa batzordean gehiengoa duten lau sindikatuek zuzendaritzarekin adostu dute soldatak %6 igotzea aurten eta %2,25 2023tik 2026ra; edota 6. gaua bertan behera uztea. LAB sindikatuko Mikel Diaz de Aldarentzat ez da nahikoa. Soldatak KPIarekin batera gaurkotzea eta bajetan ehuneko ehuna kobratzea eskatu du.

Beharginen hurrengo zita garrantzitsua astelehenean iritsiko da. Mercedeseko bost mila langileek erreferendum bidez erabakiko dute CCOO, UGT, Ekintza eta PIM sindikatuen akordioa onartzen den ala ez. LABetik argi dute ezetz bozkatuko dutela. «Oso argi daukagu ezezkoa bozkatuko dugula. Ikusten da jendea ez dagoela ados. Espero dugu ezezkoa ateratzea», esan dio NAIZ Irratiari Mikel Diaz de Aldak.

Sindikatu abertzaleko kideak oso garrantzitsutzat jo du gaurko grebak izan duen jarraipena. «Bagenekien akordioa sinatu duten sindikatuek eta enpresak gaurko greba eguna kriminalizatzen saiatuko zirela, eta horretan ari dira. Baina argi dago langileak kalean daudela akordioarekiko desadostasuna erakusten».

Gaurko, asanblada ireki batera deitu dute plantilla osoa hiru sindikatuek. Bertan, plantillaren iritzia jakin nahi dute, eta beste greba egun batzuk deitzea ala ez erabakiko dute.

Bestalde, CCOO, UGT, Ekintza eta PIM sindikatuei eskatuko diete aurreakordioa moldatzea.