Lainoa deitzen diogun hori munduko enpresa boteretsuen ordenagailuak direla azaldu du Pombok eta ohartarazi du kontzientziazio handia falta dela gure gizartean: «Asko hitz egiten da elikadura edo energia burujabetza bezalako kontzeptuez, baina jabetu behar gara gure egunerokoan teknologiaz inguratuta gaudela eta teknologia hori ezagutu behar dugula, bestela konpainia handi horien erabakien menpeko garelako».

Enpresa handi horiek gure informazioa izateak pribatutasunean arazoak eragin ditzake. Pombok azaldu du gure informazioa banan-banan ikertzen ez badute ere, gizartearen joerak aztertu eta horien gainean eragiteko baliatzen dituztela korporazio handiek; hala, herrien eta estatuen etorkizunean eragin dezakete: hauteskundeen emaitzetatik hasita, politika publiko zehatzetaraino.

Burujabetza teknologikoa lortzeko, «jarrera edo kontzientzia indibidual bat hartzetik hasi eta elkarlanean eraikitzera iristeko prozesu bat martxan jartzea litzateke egokiena», adituaren ustez. Zentzu horretan, jardunaldian egongo den Alex Haché hacktibista feministaren lana nabarmendu du Pombok: Euskarabilduaren webgunean argitaratu dituzte maila indibidualean hartu daitezkeen jarrera aktiboen gomendioak.