Gaur arratsaldeko 17:00etan hasiko da Lizarran Euskal Herriko neska gazteen topaketa. Honen ildo nagusia autodefentsa feminista izango da Haizea Kortaberriak eta Ane Sainzek esan digutenez.

Kasualitatea ere ez da Durangon azaroaren hasieran egingo den jardunaldi feminista baino hilabete lehenago egitea topaketa Lizarran. «Neska gazteok, jardunaldi hauek gure iritziak konpartitu, gazte subjetua indartu eta erronkak erabakitzeko baliatuko dugu», aitortu dute.

Egitasmoa ez da Ernaitik bertatik ateratzen. Azken udaleku feministak egitean, ohartu ziren Durangoko jardunaldietan beraien iritzi eta erronkak helarazteko saretu egin behar zutela. Neska gazteok gure hausnarketarako espazioa izatea bermatuko dugu Lizarran, gure bide orrian zein izango den zehazteko, diote Kortaberriak eta Sainzek.

Gaur hasiko den topaketan, hausnarketak egin eta berauek praktikara eramateko tailerrak egingo dituzte. «Pozik» daude, esperotakoa baino pertsona gehiago elkartuko baitira. Orotara 400-500 bat neska elkartuko gara, ondo pasa eta erabakiak hartzeko. Bertatik ateratzen diren proposamenak herrietara eramateko asmoa dute.

Bihar, hilak 5, iluntzean emango diote amaiera gaur Lizarran hasiko den topaketari.