«Epe luzera ari naiz lanean. Nire bertsiorik onena topatu nahi dut hemendik zazpi-hamar urtera»
Malen Osa Ansa (2002, Oñati) mendi korrikalaria hirugarren geratu da Golden Trail Series zirkuituan. Oñatiarrak esan du entrenatu dudanarekin, «lasterketa batzuetan maila hobea» eman zezakeela. Pozik dago «profesional izateko faktore basikoak finkatu» dituelako. Orain, mendiko eskian lehiatuko da.
Arakatzaile honek ez du audio elementua onartzen.
Hiru urte eskas daramatza Malen Osa Ansak mendi korrikalari gisara. Munduko onenen artean bidea irekitzen ari da, oso azkar, gainera. 21 urte besterik ez ditu, eta denboraldi honetan, Golden Trail Series zirkuituan podiumeko hirugarren koskara igotzea lortu du, iaz laugarren egin ondoren. Orain dela bi asteburu korritu zuen zirkuitu horretako final handia, eta bertan bederatzigarren amaitu zuen, sailkapen orokorrean hirugarren amaituta.
Zegama-Aizkorrin lortutako bigarren postuan izan da denboraldiko lorpenik handiena. Estreinakoz korritu zuen etxeko lasterketa, eta aurrenekoz aritu zen ere maratoiko distantzian. Osatutako denboraldiarekin «gustura» geratu den arren, gehiago nahi du oñatiarrak: «Entrenatu dudanarekin, lasterketa batzuetan maila hobea eman nezakeen. Oso indartsu sentitu naiz lan saioetan».