Ander Muruak maila nagusiko Lau t'erdiko Txapelketako final-laurdenak jokatuko ditu, eta Elordi izango du aurkari larunbat honetan. Arrasatearrak azken hilabeteetako maila berretsi zuen final-zortzirenetako norgehiagokan, Senarren aurka nagusitasunez irabazita, eta «bolada onari» jarraipena emateko helburua du. «Asko dut irabazteko eta gutxi galtzeko», dio Aspeko pilotariak.

Murua jakitun da «ez dela erraza izango», baina hasiera batean finalerdietara iristeko erronka jarri dio bere buruari. «Nire maila erakutsi behar dut eta 22ra iritsi», dio arrasatearrak. Hala ere, «hiru izar» izango ditu aurkari, eta ikasteko aukera ere probestu behar duela argi du. Murua pilotari ausarta da, eta hain zuzen, tantoa bukatzeko ausardia ez zaiola faltako nabarmendu du; horrekin batera, «partida gogortzean» gakoa egongo dela adierazi du.