Angliru mendateak epaile lanak egin zituen, eta Usoa Ostolazak, Laboral Kutxa-Euskadi taldeko txirrindulariak, sailkapen nagusian hiru postu egin zuen aurrera. Horiek horrela, 4. amaitu zuen, eta helmugan gertukoekin ospatzeko aukera izan zuen: «Oso pozik nago, egindako lan guztiak merezi izan du». 

Itzuliko ibilbidea aztertu du, «aurtengoa oso gogorra» dela esanez. Zarauztarrak ongi baino hobeto ezagutzen ditu Itzuliko errepideak, eta Igeldon erabakiko dela argi du. Halaber, talde lana goraipatu du, eta Laboral Kutxa-Euskadi taldeko hurrengo helburuak izendatu eta bide-orria margotu du: «Urtez-urte goraka goaz, eta nahiak zein helburuak altuagoak dira». Azkenik, Italiako Giroan ez dela egongo aurreratu du, bai, ordea, Frantziako Tourrean.