Kanterri euskarazko musikagintza aztertu eta horren inguruko hausnarketarako espazio bat sortzeko asmoz jaio zen. Gotzon Barandiaran, ekimeneko antolatzaileetako batek azaldu digu “euskarazko musikagintza bere ertz guztietatik aztertu eta horri buruzko eztabaidagune bat sortzeko asmoa duen proiektua da”, eta gaur egun udako ikastaro baten bidez hartzen du forma.

Egitasmoaren ardatzetako bat musikagintzari begirada feminista bat eskaintzea da. Horren inguruan azaldu dute “gainontzeko arte diziplinetan egiten ari garen berrikusketa feminista egin behar dela musikagintzan ere”. Izan ere, euren ustez, kulturaren beste esparru batzuetan aspaldidanik egiten ari den lanketa da, baina musikaren munduan oraindik badagoela zer hausnartu.

Horri lotuta, euskal musikagintzaren inguruko dokumentazio falta ere nabarmendu dute. “Oso gutxi daukagu idatzita gure musikagintzari buruz, oso gutxi dago publikatuta ikerketa formatuan, egin duguna aintzat hartuta”, azaldu dute elkarrizketan.

Kanterrik teoria eta praktika uztartzea ere bilatzen du. “Alde batetik gogoeta egiten dugu, baina gero kantatu egiten dugu”, diote. Gainera, eztabaidarako eta iritzi desberdinak entzuteko espazio izan nahi duela azpimarratu dute: “Horrelako zerbait antolatzen duzunean, egiten duzu pentsatzen duzuna zalantzan jarriko duen norbait entzuteko, ez gure ikuspuntua berretsiko duen norbait entzuteko”.

Emakumeen presentziaren inguruan ere aritu dira. Antolatzaileetako batek aitortu duenez, “emakume ahotsak ez nituen hainbeste entzuten, baina ariketa kontzientea egiten duzunean hutsune bat betetzen duzu”.

Memoriari lotutako irudi pertsonalak ere gogoratu ditu Lizarribarrek: “Baditut oroitzapenak, txikitan, sukaldean, Lurdes Iriondo entzuten, baina orain hasi gara bere musika gehiago entzuten”.