Gero eta ohikoagoak diren, baina orain arte behar bezala aitortu gabe zeuden guraso bakarreko familientzat mugarri bat ezarriko da Araban, Bizkaian eta Gipuzkoan guraso bakarreko familien dekretuari esker. Abenduaren hasieran onartu zuen Lakuako Gobernu Kontseiluak eta 2026ko urtarrilaren 1etik aurrera izango da indarrean. «Dekretu honekin gure familientzako oinarriak jarri ditugu», adierazi du NAIZ Irratian Izaskun Lertxundi Ama Bakarren Elkarteko Euskadiko bozeramaileak, «ondo definituta egonda, gure txartela eta txosten digitala edukiko dugu eta edozein tokira goazela gure familia eredua zein den aurkeztu ahalko dugu», gaineratu du. 

Aurrekaririk gabeko dekretu honek guraso bakarreko familiei eskubide jakin batzuk bermatuko dizkie, baita orain arte aurreikusten ez zitzaizkien diru laguntzak ere. Izan ere, «gizarteak orokorrean uste zuen diru laguntza pila bat genituela», Lertxundik dionez, «baina ez zen horrela». Dekretu berri honekin babes hori bermatuko zaie, beraien baldintzei egokituta Lertxundiren esanetan, «urtarriletik aurrera gure familia ereduek haur bakarra edukita zazpi urtera arte laguntza bat edukiko dugu, orain arte bakarrik hiru urtera arte zen». Zentzu honetan, «bi haur dituzten guraso bakarren borroka» bere egin dute eta indar handia egin dute elkartetik gurasook duten «zama handia» aintzat hartzeko, hiru aurretik gora dituzten familia anitzen kasuan egiten den bezala. 

Baina dekretu honen onurak arlo ekonomikoaz harago doaz, helburu baitu kontziliazioa bezalako esparruetan legezko zoru bat ezartzea guraso bakarreko familientzat, hauen bizimodua erraztu dezaketen neurriekin osatzen joateko aurrerantzean. Esan bezala, gero eta ohikoagoa den eredua delako guraso bakarreko familiena eta ia beti emakumeak izaten dira hautu hori egiten dutenak, Ama Bakarren Elkarteko bozeramaileak nabarmendu duenez, «orokorrean sentitzen duguna da amatasuna nahi genuela eta hau beste bide bat da».