Estilo konkretu bat dutela esatea zaila egiten zaigun arren, punkaren, rockaren eta new wave musikaren bueltan sortu dituzte ‘Kendutako azken kartela’ diskoko zortzi abestiak. Ukitu ingelesak nahikoa argiak dituen lanak, 80-90etako iruditeria sortzen digute ezbairik gabe. Bilbo grisera eramaten gaituzte hitzekin, Guggenheimik ez eta ibaiaren bazterreko faktoriak zeuden garaietara.

«Zu zara boterearen aldera pasa dena» bezalako esaldi zorrotzak, Palestinako edota munduko beste edozein puntutako genozidioak, sistemak garaitu gaituela iradokitzen duen kanturen bat, edota dena galtzen dugunean sentitzen den askatasun sentsazioaz hitz egiten digute beren abestietan.

Mikel Reparazekin grabatu dute, Bilbon bertan, eta Ines Bermejok egindako azala duen edizio fisikoa ere kaleratu dute, biniloan. The Jam, Blondie edota Anari aipatzen dituzte beren eraginen artean, baina xehe-xehe bikain kontatu zigun Etxahun Arregik lanaren nondik norakoa MusikHaria saioan. Goiko aldean entzun dezakezue. Nostalgia, karga politikoa eta soinu berezitua dira ezbairik gabe KAK! taldearen lehen diskoko hiru elementu nagusienak. Entzun eta atera zuen kontuak.