Bidean aurrera egitea, itxaropena, harremanetako gorabeherak, damuak, pozak… denetarik kontatzen digu Urtzi Azkueren Ur taldeak ‘Barruak husten’ disko berrian. Argi eta garbi dio izenburuak zein den guzti honen nahia eta asko eta asko hitzetan islatuta ikusiko dira, egunerokotasunean gertatzen zaizkigun kontuak baitira.

Sinteak, ahots prozesatuak, Daft Punken unibertsoa, Bruno Mars edota Michael Jacksonena, disco-soul ukitua duten pasarteak eta pop musika. Denetarik du diskoak, baita Kattaren ahotsa pare bat abestitan ere. Gitarrarekin jolas asko egin dute eta erritmika eta armonietan beren marka utzi dute ‘Barruak husten’ lan honetan ere. 

Eñaut Gaztañagaren estudioan izan dira diskoa lantzen eta zuzenekoekin ere laster hasiko dira martxan. Ez dute presarik eta gisa horretan entzun behar da sortu dutena. Hori bai, ea entzutean gorputzak nola erantzuten dizuen, berezko mugimendua sortzen baitu Ur taldearen musikak. Sortu dutenaren xehetasunen berri eman digute MusikHaria saioan Urtzi Azkuek eta Markel Corralek eta goiko aldean dagoen erreproduzitzeko gailuan entzun dezakezue. Gainontzean, diskoa eskuragarri dago haien bandcamp orrialdean ere.