«Ikazkin baino ezjakin asko gara» esanez abiatu du Joseba Goienola Berriatuko alkateak bere hitz hartzea Bigarren Kafean; baina ikazkin lanetan ari da herri osoa egun hauetan eta irudi ikusgarriak ari da erakusten herrian piztu duten txondorrak, ondo bidean irailaren 13an Beheko kaleko jaietako parrillan baliatzeko garaiz iritsiko da bertan egositako egurra, ikatza. 

Udalbiltzako Guretik sortuak bekaren baitan sortu da ekimena. Argimalutak konpainiak jaso du beka eta Txondor plaza izeneko lana prestatzeko egonaldia egiten ari da Berriatuan Txetxu Collado sortzailea, «proposatu zigun egonaldia egiten zuen denboran polita izango litzatekeela txondor bat martxan jartzea».

Alkateak azaldu du «dakitenen laguntza» izan dutela txondorra abian jartzeko, tartean Goizueta eta Oñatitik gerturatutako jendearena, eta auzolana izaten ari dela protagonista, «Berritxun zorionez laguntza eskatzen denean jendeak erantzun egiten du, jendeak parte hartzen du, eta 75 lagunetik gorako taldea eratu da». Izan ere, txondorra eraiki ez ezik, zaindu ere egin behar baita. Irailaren 12a arte izango dute piztuta eta egurrak ondo erantzuten badu egun horretarako ikatza eginda izatea espero dute. 

Ikatza ateratzeko emaitza esku-eskura dute, hala ere, herritarrek, «lana eta ardura eskatu ditu, baina egia esan txondorrak berak pizten du auzolan su hori eta bere inguruan sortu den giroa benetan oso polita da, jende piloa dabil laguntzen, asko etortzen dira ikustera, oso une politak ari gara bizitzen».