Udalak eta Euskal Trenbide Sareak sinatutako akordioaren ondorioz, topoaren ibilbideren ingurua eraldatzea espero du Aizpea Otaegik, Errenteriako alkateak. Obra horiek «herria eraldatuko» dutela azaldu du NAIZ irratian, eta «10 urtera Errenteriak beste itxura bat» izango duela gehitu du.

Errenteriako Udalaren helburua topoa hirian integratzea da, «kalitatezko espazio publikoa irabazteko». Otaegik azaldu duenez, «proiektuak mugikortasun jasangarriaren eta irisgarritasunaren aldeko apustua ere egiten du». Bi eremutan, Galtzarabordako estazioaren eremuan eta Gaztaño erdigunean, trenbidea estaliko da, eta «ikaragarrizko» espazioa irabaziko dela iragarri du.

Eremu tentsionatuak «momentuz eragin gutxi» izan duela aipatu du, eta «pena handiarekin» daudela azpimarratu du. Azkenik, bidaia agentziako iruzurraren ondotik elkartasuna adierazi die kaltetuei eta «geldotasuna» kritikatu du.