Nerea:
Arratsalde on, Ander.

Ander:
Hau da abiadura! Zelako esprinta! Ikaragarria!

Nerea:
Korrika etorri al zara ba?

Ander:
Ez, Nerea, ez. Oraintxe bukatu da txirrindularien lasterketa.

Nerea:
Tourra ikusten egon zara?

Ander:
NAIZ Irratian entzun dut. Iñigo Asensiok eta Julen Goikoetxeak egin dute kontakizuna. Hori da hori tentsioa! Ze urduri jarri naizen!

Nerea:
Txirrindularien munduko txapelketa garrantzitsuena da  Tourra. Ziklista onenek parte hartzen dute hor.

Ander:
Hiru asteko lehiaketa izaten da, eta egunero karrera bat edo etapa bat egiten dute. Horrela, pixkanaka, Paris hiribururaino iristen dira, eta han amaitzen da Frantziari egindako bira.

Nerea:
Denera 109 Tour izan dira historian. Lehenbiziko aldiz 1903an egin zen.

Ander:
Migel Indurain euskal txirrindulariak bost bider irabazi zuen Tourra, eta bostak jarraian.

Nerea:
Eta zenbat etapa irabazi zituen?

Ander:
Hamabi etapa, oker ez banago.

Nerea:
Tourra bost aldiz irabazi zuen Eddy Merckx flandriarrak ere. Beharbada Merckx izango da historiako txirrindularirik onena. Izan ere, 34 etapatan gailendu zen Tourrean.

Ander:
Entzun, Nerea, entzun nola kontatzen hasi diren azken etapako azken kilometroa. Ea zer iruditzen zaizun.

IÑIGO ASENSIO IRRATI ESATARIA

Nerea:
Ene ba! Zergatik esan du “talde guztiak borrokan” hasi direla? Karrerako azken kilometroan ez dira elkar joka ariko, ezta?

Ander:
Ez, neska, ez. Borrokan boxeolariek egiten dute, edo judoan eta karatean jarduten dutenek. Edo bestela Joko Olinpikoetan borroka librean.

Nerea:
Badakit, Ander, txantxetan ari nintzen.

Ander:
Karrera batean ahalegin berezi bat egiten da, azkar ibiltzeko. Nor lasterrago iritsiko, nor aurrena ailegatuko, nork irabaziko, nork garaituko, hor ibiltzen dira eman eta eman, pedalei eragiten.

Nerea:
Norgehiagoka horri, elkarren aurka lehian aritzeko ahalegin horri borroka egitea esaten zaio orduan.

Ander:
Ez dira muturrekoka ibiltzen. Ez dio batek besteari bultza egiten. Ez dute liskarra izaten. Baina bat bestea baino lasterrago helmugan sartzeko, borroka bizia sortzen da.

Nerea:
Txirrindulariak bukaerara iristen ari diren ahala, irratiko esatariak gero eta azkarrago hizketan hasten dira.

Ander:
Eta zenbat eta gehiago hurbildu helmugara, orduan eta ozenago kontatzen dute, ia oihuka.

Nerea:
Zirraragarria izaten da. Aparta, izugarria, berebizikoa!

Ander:
Entzun nahi al duzu nolakoak izan diren azken metroak?

Nerea:
Nola ez ba! Ipini, ipini grabaketa, mesedez. Emozio fuerteek bihotza inarrosten didate.

Nerea:
Oso ona! Bikaina! Tumatxa! Zaldi karrerak ere horrelako kontatzen dituzte.