Egoera latza dela badakigu, baina, beste bati azaldu beharko bagenio, ez genuke era zabalean azalduko zergatik. Gai konplexua da; adituen gaia. Eta horregatik, adituen bila joan gara. Gaia hobe ulertzeko helburuz, eta ideiak berriro ordenatu ahal izateko. Jonander Agirre Mikelez, Unai Fernandez de Betoño, AZET etxebizitza sindikatuko Ane Salvador, Aizpea Otaegi eta Denis Itxaso gonbidatu ditugu lubakira. Gai askoren inguruan mintzatu ahal izan gara haiekin, egunero entzuten ditugun kontzeptuak ulertuz eta ezagutzen ez genituenak gehituz. Hori baita azken helburua: ikastea. Txikitan marrazten genuen horretatik gertuago egon gaitezen.

Hirugarren saioan, etxebizitza alorrean oso presente dagoen, baina erakunde publikoetatik kanpo dagoen eragile batekin egin dugu topo. Horretarako, Bilbora joan gara, bertako AZET Etxebizitza Sindikatuarekin hitzordua egiteko. Bertan, Ane Salvador Errasti ezagutu dugu. Harekin, etxebizitza sindikatua zer den ulertu eta bere funtzioak zein diren ezagutu dugu. Euskal Herriko egoeraren inguruan duten ikuspegia ezagutu, eta turismoa, espekulazioa eta bestelako gaien inguruan ere hitz egin dugu.