Lau kantuko bi EP bezala aurkeztu ditu Horzdun talde hondarribiarrak binilo bakarrean kaleratu duen lana. ‘Barealdiaren ondorengo ekaitzak…’ izena eman zioten lehendabizikoari 2023an, Psilocyben bertan grabatutako lana. Bidean Mono Irazi batu zaie taldera eta haren Osinburua estudioan, Bertizaranan, grabatu dute bigarren zatia, ‘…hondamendia dakar’ EPa. 

Biak elkartuta bat egin eta LP formatuan, biniloan kaleratu dute Hagina Diskak zigiluarekin Horzdun taldekoek. Kantuen hitzak irakurtzeko, gainera, diskoa eskuratzea izango da modu bat eta bakarra. Sludge Metalaren unibertsoan mugitzen direla kontatu digute, eta bi aldeen artean badago desberdintasunik, batez ere soinuan. «Mono bidean elkartu zen eta bigarren lana grabatzerako dagoeneko taldeko kide zenez, soinua ere barneratuagoa zuen eta horregatik emaitza sendoagoa lortu dugula uste dugu», esan digute taldekideek.

Luze eta zabal aztertu ditugu diskoak, umorerako tarterik ere izan da, Uranga eta Arroyorekin batera. Baztango gaztetxean izango dira larunbat honetan, maiatzak 17 eta datorren ostiralean, hilak 23, Gasteizko Orbain Kultur Elkartean arituko dira. Gero Iruñeko Krawillen, etxean, Psilocybenean, eta Galizia aldean ere izango dira beren musika zabalduz.