NEREA:
Kaixo, Ander! Zer moduz ibili zinen aurrekoan San Tomas egunean?

ANDER:
Primeran! Nahiz eta eguraldiak ez zuen lagundu.

NEREA:
Neuk ere azkenean Donostiako Parte zaharrean bueltatxo bat emateko aukera izan nuen.

ANDER:
Ez zintudan bertan ikusi! Tira, ez da arraroa hainbeste jende dagoenean.

NEREA:
Ez genuen elkar ikusi, ez! Baina ikusi nuena, Xixili txerria izan zen!

ANDER:
Neuk ere jendez inguratuta ikusi nuen eta horrek zer pentsatua eman zidan.

NEREA:
Zergatik?

ANDER:
Egia da duela urte dezentetik ez dela Donostiako Plaza berrian San Tomas egunean egoten den txerria zozkatzen, baina ez dakit bertan kaiola baten barnean edukitzea oso egokia ote den.

NEREA:
Egia esan, niri ez zait leku aproposa iruditzen zerri bat egoteko; bertan dagoen jende pila, zarata… ziur zerriak ere estresa sentituko zuela.

ANDER:
Hala ere, esan behar da egunean zehar zaintzaile bat izan zuela aldamenean, Manu Eizagirre, eta badirudi laguna han ikusteak lasaitu egiten zuela Xixili.

 

AUDIOA  | Manu Eizagirre

NEREA:
Hala ere, Iker Gurrutxaga kazetariak larri ikusi du Manu.

ANDER:
Bai, «orain larriago ikusten zaitut, orain dela ordu erdi baino» esan dio.

NEREA:
Esandakoaren arabera, goizeko lehen orduetan lasai ibili da Manu, baina oraingo jendetzak eta euriak ez omen dute laguntzen.

ANDER:
«Zalaparta handia aterki artean». Hori bai, Manu hurbildu eta lasaitu egiten omen zen Xixili.

NEREA:
Ohartu al zara nola egin duen konparaketa Ikerrek? «Orain larriago ikusten zaitut, orain dela ordu erdi baino».

ANDER:
Konparaketek bi zati izan ohi dituzte, eta ohikoena baino hitza esaldiaren erdialdean joatea da. Aurreko esaldi hori egiteko hau izango litzateke egiturarik komunena: orain, duela ordu erdi baino larriago ikusten zaitut.

NEREA:
Askotan eguraldiaz mintzo garenean konparaketak erabiltzen ditugu: «gaur atzo baino euri gehiago egin du» edo «gaur euri gehiago egin du, atzo baino».

ANDER:
Bietan gauza bera esaten ariko ginateke, baino hitza leku ezberdinean jarrita.

NEREA:
«Uste baino jende gehiagok entzuten du gure irratsaioa» edo…

ANDER:
Jende gehiagok entzuten du irratsaioa uste dugunak baino.

NEREA:
Gure gaurko Manu protagonista ere San Tomas egunean ohi baino lehenago jaiki zen plazara garaiz iristeko.   

 

AUDIOA- Manu Eizagirre

ANDER:
Gogorra izango zen goizeko 5:00etan jaikitzea!

NEREA:
Niri izarak itsatsita geratuko zitzaizkidan!

ANDER:
Baina badakigu, gogoko lekuan, aldaparik ez!