NEREA:
Kaixo, Ander!

ANDER:
Kaixo, Nerea, zer moduz?

NEREA:
Hementxe nabil, egunkaria irakurtzen.

ANDER:
Nik aspaldi utzi nion paperezko prentsa irakurtzeari, orain dena Internet bidez egiten dut.

NEREA:
Hara! Baduzu berriak irakurtzeko ohitura?

ANDER:
Bai, esnatu eta egiten dudan lehendabiziko gauza horixe izaten da.

NEREA:
Ni ere saiatzen naiz, baina hedabide bakarra irakurtzeko astia besterik ez dut izaten, eta askotan titularrak bakarrik!

ANDER:
Niri, berriz, asko gustatzen zait era askotako prentsa irakurtzea, horrela komunikabide bakoitzak berri bat nola ematen duen ikus daiteke.

NEREA:
Badakizu aurten GARAk 25 urte beteko dituela?

ANDER:
Jakingo ez dut, ba! Gainera horren ospakizun modura, Artefaktua sortu dute.

NEREA:
Zer da, zehazki?

ANDER:
Nik baino askoz hobe azalduko digu GARAko zuzendari den Iñaki Sotok.

AUDIOA -  Iñaki Soto

NEREA:
Memoriaren inguruan egingo den ariketa kolektiboa izango da.

ANDER:
Eta, horretarako, 1977. urtetik gaur arte gertatutakoak gogoraraziko dizkigute.

NEREA:
Zergatik aukeratu dute abiapuntutzat 1977. urtea?

ANDER:
Urte hartan sortu zutelako Egin egunkaria. Denok dakigun bezala, 1998an Baltasar Garzon epailearen agindu batek egunkaria itxi zuen eta hurrengo egunean sortu zen Euskadi información. Ondoren, 1999an, Gara.

NEREA:
Beraz, 1977 prentsa independentearen sorrerako urtetzat jotzen denez, horixe hartu dute abiapuntu.

ANDER:
Lan handia egin beharko dute ordutik gertaturikoak gogorarazteko.

NEREA:
Azken 47 urte hauetako egun bakoitzeko berriak, egunkariak... A ze lana!

ANDER:
Zuzendariaren hitzetan, helburua «azken mende erdi honetan EH izan denaren irudi erreal bat ematea izango da, irudi partziala, baina erreala», eta, horretarako, lan handia egin beharko dute, bai.  

 

AUDIOA - Iñaki Soto

 

ANDER:
Iñakik aipatu duen bezala, «Kazetaritzaren ibilbidea aro honetan ez da borobil-borobila izan, baina gu saiatuko gara Artefaktuarekin forma bat ematen, ikusgarria eta zentzu bat edukiko duena».

NEREA:
Aizu, Ander, askotan erabiltzen ditugu errepikapenak gradua handitu edo txikitzeko.

ANDER:
Bai, adibidez, pilota partida asko bizi-biziak izaten dira, mugimendu handikoak.

NEREA:
Ziur kirolariek neka-neka eginda amaitzen dutela.

ANDER:
Gogoratzen aurrekoan mahai gainean zegoen armiarma handi-handia?

NEREA:
Tira, Ander, txiki-txikia zen eta!

ANDER:
Gezurra! Gau osoan zehar amesgaiztoak besterik ez nituen izan.

NEREA:
Amesgaiztoak, ziur, Egin itxi zenetik, bertako langile eta ingurukoek izan dituztenak.

ANDER:
Zoritxarrez, lotan bakarrik agertu ez direnak, eta urte luzez zama izan direnak.

NEREA:
Jendearen elkartasunari esker, hainbat egoerari aurre egitea lortu dute.

ANDER:
Eta horiei guztiei ere errekonozimendua aitortu eta egindakoa eskertzeko ere izango da Artefaktua.

 

AUDIOA-  Iñaki Soto

ANDER:
Poz-pozik hartuko dute horrelako ekimen bat Egineko langileek, seguru.

NEREA:
Izan ere, oso garrantzitsua da denon artean gertaturikoa ez ahaztea.

ANDER:
Hala da, bai. Azken batean, askotan esan ohi den bezala, izan zirelako gara, garelako izango dira.

NEREA:
Horrexegatik ikasten eta gogoratzen jarraituko dugu.

ANDER:
Eta hainbat komunikabidek edo agintarik esaten dutena itsu-itsuan ez jarraitzen.